Бағдат Бұрханбайұлы Телтаев

Телтаев Бағдат Бұрханбайұлы (23.3.1966 жылы туған, Жамбыл облысы Мерке ауданы Жауғаш батыр ауылы) – ғалым, техникалық ғылым докторы (1996), профессор (2002), Қазақстандағы жол құрылымдары механикасының ғылыми мектебін құрушы. Алматы автомобиль-жол институтын бітірген (1991). 1991 – 1996 жылы осы институтта оқытушы, аға оқытушы, жол-механика факультеті деканының орынбасары. 1996 – 2006 жылы М.Тынышбаев атындағы. ҚазККА.-да аға оқытушы, доцент, профессор, кафедра меңгерушісі. 2006 жылдан “Қазақстан жол ғылыми-зерттеу институты” АҚ-ның президенті және ҚазККА-да профессор Негізгі ғылыми еңбектері жол құрылымдарының механикасына арналған. Телтаевтың еңбектері ҚР құрылыс нормаларының “Қатқыл жол төсемелерін жобалау”, ҚР құрылыс нормалары мен ережелерінің “Автомобиль жолдары” құжаттарына, “Қазақстан территориясы автомобиль жолдарының жер төсемесі топырағының есептік тоңу тереңдігі бойынша аудандастыру” нормативтік құжатына, техникалық жоғарғы оқу орындарының “Автомобиль жолдары және аэродромдар құрылысы” мамандығы бойынша оқу бағдарламасына енген. Оның жетекшілігімен 2 ғылым докторы, 20 ғылым кандидаты даярланды. Телтаев 380-нен астам ғылыми еңбектің, оның ішінде 3 монографияның авторы. 8 оқу құралы және 3 терминологиялық сөздікті әзірлеп баспадан шығарған.