Бегалиев Ыдырыс Тоқталыұлы

Бегалиев Ыдырыс Тоқталыұлы (1954 ж.т.) – "Атамұра" Полиграфия комбинатының директоры. 1983 ж. Мәскеу полиграфия институтын бітірген..

Ыдырыс Тоқталыұлының бүкіл ғұмыры Полиграфкомбинатпен тығыз байланысты. Еңбек жолын 1975 ж. слесарь-станокшыдан бастап, комбинат директорына дейін көтерілді. 1975-90 жж. Полиграфкомбинатта слесарь-станокшы, наладчик, Теру, Басу цехтарының бастығы, 1990—93 жж. шұғыл басылым баспаханасының бас инженері, 1993-98 жж. Полиграфия комбинатының директоры қызметтерін атқарды. Полиграфия комбинаты "Атамұра" корпорациясының құрамына енген 1998 жылдан "Атамұра" Полиграфия комбинатының директоры.

Ыдырыс Тоқталыұлы тәуелсіз мемлекетіміздің баспа ісін ілгері дамытуға, полиграфия өндірісін әлемдік деңгейге көтеруге зор үлес қосты. Ол – полиграфия комбинатының өндірістік қуаты мен полиграфиялық мәдениеттің Жоғары дәрежеде болуын ұйымдастырған іскер басшы. Оның басшылығымен кәсіпорынды Жоғары сапалы, озық техникамен қайта жарақтандыру шаралары жүзеге асырылды. Кітапты басуға дейінгі жұмыс желісі жаңартылып, толық компьютерлендірілді. Төрт және бес бояулы "Rapida 105" офсеттік басу машинасы, "Amigo 1580" түптеу машинасы және басқа осы заманғы полиграфия жабдықтары орнатылды.

Полиграфкомбинат – бүгінгі әлемдік биік талаптарға толық жауап беретін ең соңғы полиграфиялық құралдармен жарақтандырылған үздік кәсіпорын. "Атамұра" Полиграфия комбинаты жыл сайын млн-даған дана полиграфиялық өнімдер басып шығарады. Осы жұмыстардың бәрінде де Ыдырыс Тоқталыұлының жетекшілік, ұйымдастырушылық үлесі бар.

Ы.Т.Бегалиев Қазақстан полиграфия өндірісінде қажетті мамандар, инженер кадрларын дайындауға да белсенді түрде атсалысып келеді. Ол Қ.И.Сәтбаев атындағы ҚазҰТУ-дың профессоры.