Бейбітшілік мүддесі үшін

«Бейбітшілік мүддесі үшін» (« В интересах мира»), жазушының мақаласы. АҚШ жазушыларына ашық хат түрінде жазылып, Әуезовтен басқа Н. Грибачев, Б. Изаков, В. Катаев, Н. Михайлов, С. Михалков, Б. Полевой, А. Софронов, А. Чаковский, М. Шолохов, А. Штейн, С. Щипачевтер қол қойған. «Литература и жизнь» газетінің 1960 ж. 18 мамырдағы санында жарияланған. Мақала шығарудың алдында АҚШ-тың барлаушы ұшағы КСРО аумағында атып түсіріліп, парашютпен жерге қонған шпион-ұшқыш Пауэре ұсталған еді. Осыған орай дүние жүзі баспасөзінде үлкен шу көтерілген. «Батыс» Кеңес Одағын айыптаса, социалистік лагерь елдері АҚШ-ты жамандап жатты. Осы оқиғаға байланысты Кеңес Одағының баспасөз органдары айыптау мақалалар жариялады. Мақала-үндеуде жазушылар АҚШ-тың тіміскі әрекетіне біржола қарсы шыққан. Шығарма американ жазушыларын бейбітшілік жолындағы күреске шақырумен аякталады. Мақала астында М. Әуезовтің фамилиясы бірінші тұрғанмен авторлық басымдықты Әуезовке де, қол койған басқа жазушыларға да таңуға болмайды. Өйткені заманға, саясатқа сай үйреншікті ойлар мен айыптаулар айтылған ұжымдық мақала деген жөн.