Биғайша Медеуова

Биғайша Медеуова (1952 жылы 14 желтоқсанда Алматы облысы, Нарынқол ауданы (қазіргі Райымбек ауданы), Қаратоған ауылында дүниеге келген) — ақын, айтыс ақыны, ұстаз. Қазақстан Жазушылар Одағының мүшесі.

1976 жылы әл-Фараби атындағы Қазақ Ұлттық университетінің тарих факультетін тамамдаған.

Еңбек жолын Қаратоған ауылында тарих, музыка пәнінің оқытушылығынан бастаған. Нарынқол, Талғар, Іле аудандарындағы мектептерде оқутәрбие жұмысы жөніндегі директордың орынбасары болып қызмет істеді.

Педагогика саласында "Мәтінді алгоритммен мазмұндау,  жұптық баяндау арқылы ҰБТ-ға дайындау",  "ҰБТ-ға дайындаудың он амалы" көмекші құралы, "Қазақ этногенезі"  плакаттар сериясының,  электронды оқулықтың авторы.

Шығармашылық

Биғайша Медеуова еліміздің мəдениет саласының, оның ішінде əдебиеттің дамуына айрықша үлес қосып, соңғы 50 жыл көлемінде еңбек етіп келеді. Жазба поэзия мен айтыс жанрларында өзіндік орны қалыптасты:

Республикалық деңгейдегі айтыстарға қатысқан. 1987 жылы «Жалын» баспасынан шыққан «Жанымның жапырақтары» атты ұжымдық жинаққа өлеңдері енген. 2003 жылы «Үш қиян» баспасынан «Ұларсарын» жыр жинағы жарық көрген

1970-2000 ж.ж аралығында облыстық жəне республикалық 30-дан астам айтысқа қатысып, жүлделі орындарға ие болған. Атап айтсақ, ақиық ақын М.Мақатаевтың 50, 60, 70, 80 жылдық мерейтойына, Қ. Жұбановтың 90 жылдығына, Ж.Жабаевтың 150 жылдығына, С. Аронұлының мерейтойына т.б арналған республикалық айтыстардың   жүлдегері атанған;

«Жанымның жапырақтары», «Ұларсарын», “Ақ боз атты арулар”, “Күнге қолын созған қалалар”, “Тұрпанға шапқан ту ұстап” жыр кітаптарының авторы. Өлеңдері “Алматы антологиясына” жəне “Қазақ поэзиясының антологиясына” енген. Соңғы жылдары “Аламан қыздардың ақырғы шайқасы", "Тіршіліктің майданы" кітаптарын жазды.

Соңғы елу жыл аралығында өлең топтамалары “Жалын”. “Қазақ əдебиеті”, “Жұлдыз”, “Ана тілі”. “Таңшолпан” т.б республикалық мерзімді баспасөзде, газет-журналдарда тұрақты жарияланып келеді.

2012 жылы Қазақстан Жазушылар Одағында 60 жылдық мерейтойына орай ауқымды түрде əдеби шығармашылық кеші өтті.

Қазақстан Тəуелсіздігінің 20 жылдығына арналған Республикалық мүшəйрада II орын иеленген.

Марапаттары

• 1976 жылы Қазақстан ЛКСМ Орталық комитетінің Құрмет грамотасымен марапатталған.

• 2000 жылы білім беру саласындағы ерекше еңбегі үшін «Қазақстан Республикасы білім беру ісінің үздігі» белгісімен марапатталған

• 2008 жылы жас ұрпақты оқыту жəне тəрбиелеу ісіндегі елеулі табыстары үшін Ы. Алтынсарин белгісімен марапатталған

• 2011 жылы Райымбек ауданының қоғамдық-мəдени өмірін дамытуға қосқан ұзақжылдық үлесі үшін “Райымбек ауданының құрметті азаматы” атанған.

• 2021 жылы Халықаралық Алаш сыйлығының лауреаты (Күнге қолын созған қалалар кітабы үшін)

• 2021 жылы Қазақстан Республикасының Тәуелсіздігіне 30 жыл мерекелік медалімен наградталды.