Бодун

Бодун, бойун (“халық”, “қауым”, “бағынышты ел”) — ежелгі және орта ғасырларда түркілер арасында қандас туыстықты, саяси тұтастықты білдірген атау. Алғаш рет ежелгі түркі сына жазбаларында ұшырасады. Күлтегін тас жазуында “Мен өзім тардуш халқына (бодун) шад болдым… Тоғыз оғыз халқы (бодун) “менің өз халқым болды (бодуным ерті)” деп жазылған. Бодун атауы “ру”, “тайпа” мағынасындағы түріктің ежелгі “бод” сөзіне көптік жалғауы жалғану арқылы шыққан. Әдепкі кезде ол тілі мен этникалық жағынан өзара жақын түркі тайпаларының бірлестігін білдірген. Кейін мағынасы өзгеріп, Бодун жалпы халық, бұқара (қара бодун) деген мәнге ие болды.