Бозақор

Бозақор — ежелгі қоныс орны. Ортағасырлық Сауран қаласының батыс жағында 5 — 6 км жерде. 1973 ж. Оңтүстік Қазақстан археология экспедициясы (жетекшісі С. Жолдасбаев) зерттеген. Жергілікті тұрғындардың айтуынша, Бозақор деп аталу себебі — бұл жерде боза жасалынып, өткен-кеткен жолаушыларға сатылып тұрған. Бозақор мекенінің жанынан өтетін үлкен керуен жолы осыны айғақтайды. Бозақор сыртқы көрінісі төртбұрышты, аум. 24х20 м, биіктігі 80 см төбе. Мекен жайдың төрт жағында құдықтардың орны сақталған. Қазба жұмысы оңтүстік-шығыс жағындағы 15х8 м аумаққа жүргізілді. Екі бөлменің едендері мен қабырғалары ашылып, көзе сынықтары алынды. Алынған заттардың барлығы кезінде күнделікті шаруада пайдаланылған қарапайым керсен, күбі, көзелер. Боза сияқты сұйық тамақ сақтайтын ақшыл, көк бояумен сырланған ыдыстар көптеп кездеседі. Қыш ыдыстарының жасалу түрлеріне және сырлану тәсіліне қарағанда, Бозақор мекені б.з. 8 — 10 ғасырларында болған мекен жайға ұқсайды.