Болат Жамитұлы Өтемұратов

Уикипедия — ашық энциклопедиясынан алынған мәлімет
Jump to navigation Jump to search
Болат Өтемұратов
Сурет
Туған күні

13 қараша 1957 (1957-11-13) (63 жас)

Туған жері

Гурьев, ҚазССР

Азаматтығы

Қазақстан

Компаниясы

Верный Капитал

Лауазымы

Негізгі үлескер

Білімі

Алматы халық шаруашылық институты

Болат Жамитұлы Өтемұратов (1957 ж. 13 қараша) — қазақстандық кәсіпкер,миллиардер. Қазақстан Теннис федерациясының президенті, ITF Халықаралық теннис федерациясының вице-президенті және Директорлар кеңесінің мүшесі, қоғам қайраткері.

Өмірбаяны[өңдеу]

1957 жылы 13 қарашада Қазақ КСР Гурьев қаласында (қазіргі — Атырау) дүниеге келді. Руы - қожа.

Қызылорда қаласындағы К.Е. Ворошилов атындағы № 3 мектепте білім алып, 1975 жылы 10-сыныпты бітірді.

1981 жылы Алматы халық шаруашылығы институтын тәмамдап, экономист мамандығын алды. Институтты бітіргеннен кейін, сол жерде оқытушы болып, кейіннен 1986 жылға дейін Алматы сауда басқармасы жүйесінде жұмыс істеді. 1986-1990 жылдары Кеңестік аудандық атқару комитеті төрағасының орынбасары болды.

1990-1992 жылдары Қазақстан Республикасының Сыртқы экономикалық байланыстар жөніндегі мемлекеттік комитеті – кейіннен Қазақстан Республикасының Сыртқы экономикалық байланыстар жөніндегі министрлігінде бөлім бастығы, басқарма бастығы болып жұмыс істеді. 1992 жылы Австриядағы Қазақ сауда үйінің бас директоры болып тағайындалды. 1993 жылы Қазақстанға оралып, ҚР Сыртқы экономикалық байланыстар министрінің орынбасары (1993-94 жж.), ҚР Өнеркәсіп және сауда министрінің бірінші орынбасары (1994-1995 жж.) ретінде қызмет атқарды.

1996-1999 жылдары – Қазақстан Республикасының Швейцариядағы Төтенше және Өкілетті Елшісі, Женева қаласындағы БҰҰ бөлімшесі мен басқа да халықаралық ұйымдардың тұрақты өкілі.

ҚР Президентінің Әкімшілігінде әр түрлі лауазымдарды иеленді: 1999 жылғы ақпаннан 2003 жылғы маусымға дейін — ҚР Президентінің Сыртқы саяси және сыртқы экономикалық мәселелер жөніндегі көмекшісі, 2003 жылғы маусымнан 2006 жылғы наурызға дейін — ҚР Қауіпсіздік кеңесінің хатшысы, сонымен қатар ҚР Президенті жанындағы Демократия және азаматтық қоғам мәселелері жөніндегі ұлттық комиссияның төрағасы (2004 ж. қараша – 2006 ж. наурыз). 2006 жылғы наурыздан 2008 жылғы желтоқсанға дейін – ҚР Президентінің Іс басқарушысы. 2007 жылы Қазақстан теннис федерациясының президенті болып сайланды. 2007 жылғы шілдеден - «Нұр Отан» Халықтық-Демократиялық партиясының Саяси кеңесінің мүшесі.

2008 жылғы желтоқсаннан 2013 жылғы наурызға дейін ҚР Президентінің штаттан тыс кеңесшісі, 2010 жылғы мамырдан 2013 жылғы наурызға дейін - Қырғыз Республикасымен ынтымақтастық мәселелері жөніндегі ҚР Президентінің Арнайы өкілі болды.

2019 жылғы 1 қазаннан бастап Халықаралық теннис федерациясының вице-президенті болып сайланды.

Коммерциялық қызметі[өңдеу]

Болат Өтемұратов – Қазақстанның ірі кәсіпкерлерінің бірі[1]. Оның алғашқы ірі жобасы — «АТФ Банкінің» дамуы және оның UniCredit италиялық тобына сәтті сатылуы (1995 – 2007 жж. қараша). Осы кезеңде банк шағын қаржы мекемесінен 160 бөлімшесі және 8 миллиардтық теңгерімі бар ірі мультиөңірлік және мультиөнімдік қаржы тобына дейін өсті[2]. 2009 жылғы дағдарыстан кейін мына банктерді құрды: Kassa Nova –Қазақстандағы алғашқы микрокредиттік банк және ForteBank — бизнеске арналған банк. 2014 жылдың мамыр айында «Самұрық-Қазына» ҰӘҚ бизнесмен Болат Өтемұратовқа Темірбанктегі өз үлесін және Альянс банктегі өз акцияларының бір бөлігін сату бойынша мәмілені аяқтады. Қор «Темірбанк» АҚ-ның 79,88% қарапайым акциясын 35,7 млрд. теңгеге, сондай-ақ «Альянс Банк» АҚ-ның 16% қарапайым және артықшылықты акциясын 1,5 млрд теңгеге сатты. «Темірбанк» АҚ қосымша 2010-2012 жылдары бөлінбеген пайда есебінен, «Самұрық-Қазына» АҚ-ға 9,1 млрд теңге көлемінде үлеспайда төледі. Мәміле нәтижесінде «Самұрық-Қазына» АҚ 51% қарапайым және артықшылықты акциялармен «Альянс Банк» АҚ акцияларының бақылау пакетін сақтап қалды, ал Болат Өтемұратов «Темірбанк» АҚ-дағы бақылаушы акционерге айналды. Осы мәмілеге қатысты Өтемұратов келесідей пікір білдірді: «Темірбанк» акцияларының бақылау пакетін және «Альянс Банк» акцияларының миноритарлық пакетін сатып алу жөніндегі мәміленің аяқталуы осы банктерді қалпына келтіру үдерісіндегі негізгі қадам болып табылады. «Альянс Банкіне» қатысты «Самұрық-Қазына» қорымен бірлесіп, банк капиталын берік қалпына келтіру мақсатында оның сыртқы міндеттемелерін қайта құрылымдау бойынша банк кредиторларының өкілдерімен мұқият және жан-жақты келіссөздер жүргізілуде. Өз тарапымнан, мен «Темірбанктің» капиталын құю және оларды болашақта біріктіру арқылы «Альянс банкті» қалпына келтіруге қатысуға дайынмын». Сонымен қатар, Өтемұратов мырза «Верный Капитал» инвестициялық тобының негізгі жарнашысы (акционері емес) болып табылады, VimpelCom Ltd-мен бірлесіп, Beeline маркасымен жұмыс істеуші екі телекоммуникациялық операторға – Қазақстандағы «КарТел» және Қырғызстандағы «Sky Mobile» операторларына ие.

Дәулеті[өңдеу]

Forbes мәліметтері бойынша, Өтемұратовтың дәулеті 2019 жылғы мамырдағы мәліметтер бойынша 3,4 млрд АҚШ долларын құрады[3].

Қоғамдық және қайырымдылық қызметі[өңдеу]

2007 жылғы тамызда Болат Өтемұратов ҚР Теннис федерациясының президенті болып сайланды. Федерацияда «Мектептегі теннис бастамасы» енгізілуде, «Он жасқа дейінгілерге арналған теннис» бағдарламасы дамытылуда. Team Kazakhstan теннис академиясы құрылды, бұл - теннистен ұлттық құраманың болашақ мүшелері дайындықтан өтетін интернат түріндегі оқу орны. Теннистен ерлер құрамасы үш рет Дэвис Кубогының ширек финалына шықты (2011, 2013, 2014 жж.), әйелдер құрамасы Федерация Кубогының әлемдік тобында өнер көрсетеді.

2015 жылғы желтоқсанда 2019 жылға дейін Қазақстан Теннис федерациясының президенті лауазымына қайта сайланды. 2015 жылдан бері Болат Өтемұратов Халықаралық теннис федерациясы (ITF) Директорлар кеңесінің және Дэвис Кубогы комитетінің құрамына кіреді, сондай-ақ әлемдік теннисті дамытуға белсенді қатысады. Қазақстанда теннисті дамытудағы зор жетістіктері үшін Халықаралық теннис федерациясының және Азия теннис федерациясының сыйлықтарымен марапатталды[4][5].

2019 жылдың қыркүйегінде Болат Өтемұратов Халықаралық теннис федерациясының (ITF) Директорлар кеңесінің мүшелігіне қайта сайланды, сондай-ақ ұйымның вице-президенті лауазымына тағайындалды[6]. 2019 жылғы қазан айында Қазақстан теннис федерациясы Нұр-Сұлтан қаласында Новак Джокович пен Рафаель Надальдің қайырымдылық матчын ұйымдастырды[7].

2014 жылы Болат Өтемұратовтың қайырымдылық қоры құрылды. Қор қызметінің салалары мына бағыттарды қамтиды:

  • «Аутизм. Әлем баршаға ортақ» бағдарламасы – Қазақстанның 8 қаласында – Нұр-Сұлтан, Алматы, Өскемен, Қызылорда, Ақтөбе, Орал, Шымкент және Петропавл қалаларында аутистік спектрі бұзылған балаларға арналған «Асыл Мирас» аутизм-орталықтары табысты жұмыс істейді. Жыл сайын «Аутизм. Мүмкіндіктер әлемі» халықаралық конференциясы өткізіледі.
  • Қызыл Жарты Ай қоғамымен әріптестікте Төтенше жағдайлар кезінде зардап шеккендерге қаржылай көмек көрсетеді[8];
  • БЦС ауыратын балалар ата-аналарының Арди қауымдастығының жобаларына қолдау көрсетеді[9];
  • Көп балалы және аз қамтылған отбасыларға арналған тұрғын үй құрылысы жөніндегі «Баламекен» жобасы – «Баламекен» жобасы аясында Болат Өтемұратов қоры Қызылордада 100 аз қамтылған көп балалы отбасыға арнап тұрғын үйлер салды[10]. Бұл жобаны жүзеге асыру құны 450 миллион теңгені құрады. Арыс қаласында 2019 жылы маусымда оқ-дәрі қоймасындағы жарылыс кезінде тұрғын үйінен айырылған жергілікті тұрғындарға 50 жаңа үйдің кілттері тапсырылды. Баспаналар 100 отбасыға есептелген. Қор осы мақсатқа 850 миллион теңге бөлді[11]. 2020 жылғы мамырда Болат Өтемұратов Түркістан облысы Мақтаарал ауданының су тасқынынан зардап шеккен тұрғындарына арнап 150 жаңа үйдің құрылысына 6 млн АҚШ долларын бөлді[12];
  • Алматы Ботаникалық бағын қайта құру. 2020 жылдың мамыр айында, Алматыға жұмыс сапары аясында ҚР Президенті Қасым-Жомарт Тоқаев Ботаникалық баққа барып, құны 15 миллион АҚШ долларын құраған бақты қайта құру жобасына жоғары баға берді[13][14];
  • Батырхан Шүкенов атындағы қорға қолдау көрсету[15].

Болат Өтемұратов қоры Burabike Fest спорттық-музыкалық қайырымдылық фестивалін ұйымдастырушылардың бірі болып табылады. Қайырымдылық фестивалі өткізілген жеті жылы ішінде 1 млрд теңге жиналды, бұл қаражат Қазақстанның балалар медициналық мекемелерін, перинаталдық және оңалту орталықтарын жарақтандыруға жұмсалды[16].

2019 жылы Қор білім беру, денсаулық сақтау, мәдениет, ғылым, табиғи апаттар мен техногендік апаттардан зардап шеккендерді қолдау, мұқтаждарға арналған тұрғын үйлер салу саласындағы қайырымдылық жобаларды іске асыруға 6 млрд теңге жұмсады[17].

2020 жылғы наурызда Болат Өтемұратов қоры Нұр-Сұлтан және Алматы қалаларындағы коронавирустық инфекцияға қарсы күрес шараларына 200 миллион теңге бөлді[18]. Қор Нұр-Сұлтан және Алматы қалаларының денсаулық сақтау басқармаларына коронавирусты анықтауға арналған 94 мың экспресс-тест табыстады[19].

Болат Өтемұратов Қазақстан Республикасының Тұңғыш Президенті Нұрсұлтан Назарбаевтың үндеуіне алғашқылардың бірі болып жауап берген қазақстандық кәсіпкерлердің қатарында «Верный Капитал» компаниялар тобы арқылы Коронавирусқа қарсы іс-қимыл жөніндегі республикалық қорға 1 миллион АҚШ доллары мөлшерінде сома бөлетіні туралы шешімін жариялады[20].

Болат Өтемұратов Балет пен ұлттық биді қолдау және дамыту қорының Қамқоршылық кеңесінің төрағасы болып табылады, қазақстандық музыкант Батырхан Шүкеновтің қорына қолдау көрсетеді, Ағаш және мыс үрмелі аспаптардың республикалық конкурсын өткізуді және Құрманғазы атындағы ұлттық консерваторияның дарынды оқушылары үшін шәкіртақыны қаржыландырады. Оның қамқорлығымен Forte Bank Kulanshi Art Space көрме кеңістігінде Құланшы заманауи өнер орталығының тұрақты көрмелері өтеді. «Назарбаев қорының» құрметті қамқоршысы.

Әлеуметтік және экологиялық жауапкершілігі[өңдеу]

Бизнесменге тиесілі компания БАҚ арқылы өзінің экологиялық жауаптылығын көрсетеді, 2019 жылғы 12 наурызда ауаның ластануы және экология мәселесі бойынша талқылау кездеуін ұйымдастырды[21]. Оның қайырымдылық қоры Алматы қаласындағы Ботаникалық бақты қайта құру жобасын жүргізуде. Қайта жаңартудан кейін Ботаникалық бақ Президент Қасым-Жомарт Тоқаевқа көрсетілді. Қайта құруға 15 млн АҚШ доллары мөлшерінде қаражат жұмсалды[22].

2019 жылы Қазақстан теннис федерациясына қалалық әкімдік «Қарағанды орталық саябағынан» теннис орталығын салуға жер бөлді. Осы себепті жұртшылық, тұрғындар және экологиялық белсенділер наразылық толқынын көтерді және бұған жауап ретінде Теннис федерациясы құрылыс орнын ауыстыруға дайындығы туралы мәлімдеме жасады. Нәтижесінде, қала тұрғындары мемлекетке тиесілі саябақ аумағын және ондағы жас ағаштарды сақтап қалды. Теннис орталығы үшін ҚТФ басқа орын табуға бел буды. Инвестициялар көлемі 2,2 млрд теңгені құрайды [23].

2019 жылы Павлодар қалалық әкімдігі өткізген тендер шеңберінде, «ForteBank» АҚ филиал ғимаратының құрылысы үшін Павлодар қаласындағы «Денсаулық» саябағының жер тілімін уақытша пайдалану (жалдау) құқығын алды. Бұған наразы болған тұрғындар мен экологтар саябақтың жойылуына және құрылыстың салынуына үзілді-кесілді қарсы шықты. Форте Банк заңнама талабымен 1:15 есебінен өтем ретінде жаңа ағаштар отырғызды. Заң талабы бойынша саябақтағы құрылыс мәселесі бойынша қоғамдық тыңдаулар өткізілген жоқ, тек жұртшылық наразылығынан кейін ғана тыңдауды 16 мамырда өткізу туралы шешім қабылданды. Саябақтың аумағы қоғамдық тыңдаулар өткізілмей қоршалып, 9 сәуірде ағаштарды заңсыз кесу басталды[24][25]. 2012 жылы IX өңіраралық ынтымақтастық форумы қарсаңында президенттер Назарбаев пен Путиннің келуіне байланысты «Денсаулық» саябағының бюджет қаражаты есебінен күрделі абаттандырудан өтуі де саябақтың құрылысқа берілуіне кедергі жасамады.

Марапаттары[өңдеу]

Отбасы[өңдеу]

Жұбайы – Өтемұратова (Байшуақова) Ажар Әбжәмиқызы. Балалары: ұлдары – Әлидар Өтемұратов (1979 жылы туған) және Әнуар Өтемұратов (1983 жылы туған), қызы – Динара (2003 жылы туған).

Дереккөздер[өңдеу]

  1. https://forbes.kz/ranking/object/41
  2. https://bulatutemuratov.kz/stati/kak-bulat-utemuratov-sozdal-privlekatelnyj-dlya-inostrannyh-investorov-finansovyj-institut-i-chto-iz-etogo-poluchilos/
  3. https://forbes.kz/ranking/50_samyih_vliyatelnyih_biznesmenov_-_2019
  4. https://tengrinews.kz/tennis/bulat-utemuratov-pozdravil-mihaila-kukushkina-volevoy-373180/
  5. https://ktf.kz/kz/federation/governance/?season=0&type=1&id=1
  6. https://www.zakon.kz/4988276-bulat-utemuratov-izbran-vitse.html
  7. https://www.zakon.kz/4980492-n-r-s-ltan-a-dzhokovich-pen-nadal-keled.html
  8. https://qamshy.kz/article/36109-qyzyl-dgarty-ay-otemuratov-qory-tasqyn-sudan-zardap-shekkenderge-komektesedi
  9. https://utemuratovfund.org/kk/projects/-4
  10. https://egemen.kz/article/199902-balameken-dgobasy-bastaldy
  11. https://24.kz/kz/zha-aly-tar/o-am/item/354455-arys-alasynda-100-otbasy-baspanaly-boldy
  12. https://holanews.kz/view/news/4858362
  13. https://sputniknews.kz/society/20200512/13951487/toqaev-almaty-botanikalyq-baq.html
  14. https://vernycapital.com/kz/news/467-otemuratov-tokaevka-botanikalyk-bakty-kajta-zhanartudan-kejin-korsetti-bul-bizdin-almatyga-syjlygymyz-bak-memleket-menshiginde-kalady
  15. https://batyr.foundation/
  16. http://www.burabike.kz/kz
  17. https://egemen.kz/article/215566-qayyrymdylyq-dgobalaryna-6-mlrd-tenhge-bolgen-qor
  18. https://informburo.kz/kaz/biz-birgemiz-ttenshe-zhaday-keznde-kmge-zhne-anday-kmek-berled.html
  19. https://utemuratovfund.org/kk/news/42
  20. https://azattyq-ruhy.kz/society/5817-vernyi-kapital-kompaniialar-toby-koronaviruspen-kureske-1-million-dollar-boldi
  21. https://vlast.kz/novosti/32033-eksperty-obsudat-problemy-ekologii-gorodov-kazahstana.html
  22. https://vernycapital.com/kz/news/467-otemuratov-tokaevka-botanikalyk-bakty-kajta-zhanartudan-kejin-korsetti-bul-bizdin-almatyga-syjlygymyz-bak-memleket-menshiginde-kalady
  23. http://ekaraganda.kz/?mod=news_read&id=86281
  24. https://pavon.kz/post/view/60797
  25. https://pavon.kz/post/view/61015
  26. https://bulatutemuratov.kz/stati/zhomart-zh-rek-i-altyn-zh-rek-pochemu-bulata-utemuratova-vybrali-blagotvoritelem-goda/