Біздің Сәбит (фильм)

• Біздің Сәбит— "Қазақтелефильм" студиясының (1970) туындысы..

Фильм Леонид Соболевтен Сәбит Мұқанов туралы жақсы лебізімен басталады. Экранда Л. Соболев өзінің С. Мұқановпен 1934 жылы Жазушылар Одағының сьезінде кездескенін, одан әрі Мұқановтың қандай тұрғыдағы жазушы екендігін баяндап береді. Кішкене экранда Мұқановтың алып тұлғасы. Өз кітапханасында әлденені шұқшия оқып, ойлана отырып, әлденені өзінше пайымдайтындай. Бұдан әрі Мұқановтың жастар арасында, Қапшағай ГЭС-індегі кезеңдері кезектесе отырып көрсетілген. Телефильмде "Ботагөз" фильмінен көрініс бар. Бұлай дейтініміз көріністердің көрерменге қажет нәрсені айтып беруінде. Режиссер фильмге Асқар мен Амантай арасындағы келіспеушілік диалогтарды таңдаған. Мұнда режиссер адамдар арасындағы шиеленісті, тартысты алған.

Мұқановтың "Сәкен туралы шығармалары" телефильмде әңгіме болса, екінші жағынан Қазақ драма театрында қойылып жүрген Сәкен Сейфуллин спектаклінен көрініс беріледі. Сәкен рөлінде ойнаушы артист Әнуарбек Молдабеков революция атынан тақпақтатып сөйлеп тұрады. Міне, фильмде Сәбеннің Шоқан туралы "Аққан жұлдыз" атты роман жазғандығы көрсетілсе, онда Шоканның бүгінгі шындығы, ескерткіші көрсетіледі. Енді Мұқановтың бір кезде Жамбылмен, Кенен Әзірбаевпен, Қарақалпақ достарында болуы, Шолохов, Фадеев, Әуезовтермен бір жүруі, туған ел төсінде, малшы қауым арасында бәрі жанды хроника арқылы баяндалады. Бұл фильмді көріп отырып, қазақ кеңес әдебиетінің алыбы С. Мұқановпен қайта бір кездескендей боласыз.

Сценарий авторы - А. Сатаев, режиссері — Ә. Дүйімбаев, операторы -Кривинцов.

• Біздің Сәбит— "Қазақтелефильм" студиясының 2 бөлімді, орыс тіліндегі, ақ-қара түсті деректі фильмі (1971)..

Фильм қазақтың талантты жазушысы Сәбит Мұқановтың шығармашылығы, қоғамдағы қызметі турасында. Шығарманың сюжеттік желісін К. Әзірбаев, С. Эйзенштейн, Л. Рошаль, Ж. Жабаев, Ғабит Махмұтұлы Мүсірепов және екі мәрте Социалистік Еңбек Ерлері Ы. Жақаев, Н. Алдабергеновпен кездесулері құрайды. Жазушы Д. Соболевтің ілеспе сөзі Мұқановтың Одақтық әдебиеттегі орны мен маңызы турасында құнды пікірлер білдіреді. Фильмде "Ботагөз" кинокартинасынан үзінділер және мұрағаттағы хроникалардан да кадрлар көрсетіледі.

Режиссеры — Ә. Дүйімбаев, операторы — Ю. Монашев.