Біріккен Танзания Республикасы

Уикипедия — ашық энциклопедиясынан алынған мәлімет
Jump to navigation Jump to search
Біріккен Танзания Республикасы

Біріккен Танзания Республикасы — Африканың оңтүстік-шығысында орналасқан мемлекет. Жер аумағы — 945,1 мың км². Халқы — 32 млн. (1997). Оның 98,9%-і африкалықтар (100-ден аса ұсақ тайпалардан тұрады), 0,6%-і арабтар, қалғаны — еуропалықтар. Діні жағынан 35%-і мұсылмандар, 44%-і христиандар, 21%-і жергілікті дінге табынушылар. Астанасы — Дар ас-Салам (2 млн). Ресми тілдері — ағылшын және суахаили тілдері. Мемлекет басшысы — президент. [1]

Африка құрлығындағы ең биік жер — Килиманджаро жанартауы, ұлы көлдер — Танганьика, Виктория, Ньяса осы елмен шектесіп жатыр. Осы маңдағы ну ормандағы жан-жануарлардың көптігі, Танга қөл төңірегіндегі ғажайып жағажайлар, күкірт сулы арасан бұлақтары елді дүниежүзілік туризмнің орталығына айналдыра бастады. Біріккен Танзания Республикасының құрлықтағы жері мен Занзибар аралында адам баласы өте ерте заманнан бастап тіршілік ете бастаған. 7 — 8 ғ-ларда арабтар сауда жүргізетін қоныстар тұрғызды да, Занзибарда мұсылман сұлтандығы пайда болды. Бұл сұлтандық 16 — 17 ғ-ларда Португалияның ықпалына түсті, ал 18 ғ-дан бастап Оман және Маскат сұл-тандарына бағынды. 1832 ж. Оман сұлтаны әс-Сайид өз астанасын Занзибарға көшіріп, осы арал мен оған шектесіп жатқан құрлықта құрама империя құрды. Оның құрлықтағы бөлігін 1884 ж. Германия басып алып, өз отарына айналдырды. Онда Германия кофе мен шай өсіретін плантациялар орнатуға көп қаражат жұмсады. Бірақ 1-дүниежүз. соғыстан кейін Танганика атанған бұл жер Англияның басқаруына берілді. 2-дүние-жүз. соғыстан кейін Шығыс Африкада ұлт-азаттық қозғалысы қатты күшейді. 1961 ж. Танганика тәуелсіз ел болып жарияланып, бір жылдан кейін республика болды. 1963 ж. Занзибар сұлтандығы тәуелсіздік алды. Келесі жылы сұлтан үкіметі құлатылып, халықтық республика құрылды. 1964 ж. 26 сәуірде Танганика мен Занзибар бірігіп, Біріккен Танзания Республикасын құрды. Ол — БҰҰ-ның және Британ достастығының, Африка бірлігі ұйымының мүшесі. [1]

Біріккен Танзания Республикасы — нашар дамыған, аграрлы ел. Сыртқы елдерге қарызы (7,7 млрд) — жалпы ұлттық өнімнен 2,5 есе көп. Дегенмен, соңғы уақытта туризмнің дами бастауы елдің экономикасы мен мәдениетінің өркендеуіне қолайлы жағдай туғызып отыр. Сыртқы саудадағы негізгі серіктестері: Ұлыбритания, Германия, Италия, Голландия, Жапония.[1]

Дереккөздер[өңдеу]

  1. a b c «Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 жыл, ISBN 5-89800-123-9, II том