Валюталық келісім

Валюталық келісім — белгілі бір валюталық қарым-қатынастарды реттеуге қатысты өзара құқылар мен міндеттерді белгілейтін екі жақты не көп жақты мемлекетаралық келісім. Валюталық келісімде халықарық есеп айырысу мен кредит бөлу жөніндегі шарттар мен нормалар қарастырылады. Дамыған елдер арасында жүргізілетін валюталық келісімде, көбінесе, сыртқы сауданы ынталандыру және капиталды пайдалы орынға орналастыруға қолайлы жағдай туғызу көзделеді. Бірінші валюталық келісімге 1865 ж. Франция, Бельгия, Италия және Швейцария арасында жасалған Латын қаржы келісімін жатқызуға болады. Мұнда біртұтас ақша жүйесін орнықтыру, яғни бір ел ақшасының келісім жасалған мемлекеттер территориясында заңды төлем құралы қызметін атқару жайы қарастырылған еді. Сол сияқты, әлемдік валюта жүйесін құруда Бреттенвуд (1944), Ямайка (1976), Маастрихт (1993) келісімдерінің маңызы зор болды.