Вегетативтік әдіс

Вегетативтік әдіс – өсімдіктерді арнаулы вегетациялық үйде өсіру арқылы ғылыми-зерттеу жұмыстарын жүргізудің лабораториялық әдісі. В. ә. арқылы өсімдікке қажетті қоректік заттардың, сыртқы орта фактоларыныңр (температура, ылғалдық, сәуле), хим. препараттардың әсері және өсімдікке қажетті судың мөлшері зерттеледі. Белгілі бір фактордың өсімдік тіршілігіне тигізетін әсерін анықтау үшін ыдыстарға топырақ орнына таза құм немесе дистелденген су толтырып, оған қажетті хим. реактивтер қосылады. Белгілі бір фактордың өсімдікке тигізетін әсерін өсімдіктің өнімін есептеу, анат. өзгерісін, биохим. динамикасын зерттеу арқылы анықтайды. Өсімдік өсірілетін вегетац. үйдің төбесі шынымен жабылып, ондағы температура қажетті мөлшерден артық та, кем де болмауы керек. Өсімдік суда өсірілетін болса, оны шыныдан жасалған ыдысқа, ал топырақта не құмда өсірілсе темірден жасалған ыдысқа отырғызады. Темір ыдыстың сыртын (күн сәулесін өткізбес үшін) ақ бояумен, ішкі жағын асфальт лагымен бояйды. Өсімдікті отырғызбас бұрын ыдыстағы топырақтың немесе құмның дымқылдығын қажетті дәрежеге жеткізеді.