Гелиофизика

Гелиофизика(грек. helіos – Күн және физика) – астрофизиканың Күн физикасына байланысты мәселелерін зерттейтін саласы. Күн – жарық пен жылудың көзі болғандықтан, Күнді зерттеу – ең іргелі мәселенің бірі. Күн табиғатында электрмагниттік күштердің шешуші рөл атқаратындығы анықталып отыр. Күннен Жерге ультракүлгін және рентген сәулелері, радиотолқындар мен зарядталған бөлшектер тасқыны үнемі келіп тұрады. Күн затының тығыздығы мен температурасы, оның атмосферасындағы заттың қозғалыс жылдамдығы, химия элемент атомдарының қозуы мен иондалуы, Күннің электр және магнит өрістері сияқты сан алуан құбылыстар спектроскоптық, спектрометрлік, фотометрлік, фотография және радиоастрон. тәсілдердің көмегімен зерттеледі. Атмосферадан жоғары көтерілетін аспаптардың көмегімен Күн спектрінің ультракүлгін және рентгендік бөлігіндегі сәулелердің қуаты мен Күннің корпускулалық тасқыны анықталады. Осылай алынған деректерге теория физиканың тәсілдерін қолдана отырып, Күннің бірыңғай физика моделін жасауға болады. Бірақ Күндегі процестер тым күрделі, оларды толығымен түсіндіретін теория әзірше қалыптасқан жоқ.