Геологиялық формациялар

Геологиялық формациялар - генетикалық, парагенетикалық, стратиграфиялық тұрғыдан, немесе өзге де ортақ сипаттары тұрғысынан топтастырылған геологиялық денелер бірлестігі. Геологиялық формацияларды генетикалық бірлестіктер ретінде оқшаулау ұстанымдары төмендегі анықтамаға сүйенеді: "Геологиялық формация дегеніміз — түзілу жағдайының ортақтығымен (ұқсастығымен) сипатталатын, жер қыртысының басты-басты құрылымдық элементтері дамуының нақтылы сатыларында ғана калыптасқан тау жынысытардың генетикалық түрлерінің заңды және тұрақты түрде астасу бірлестіктері" .

Терминнің парагенетикалық бірлестік тұрғысынан дәйектелген анықтамасы: "Геологиялық формация дегеніміз — жер қыртысы құрамындағы жекелеген тау жынысы қабаттарының бір-бірімен парагенетикалық тұрғыдан астасу нәтижесінде түзіліп, уақыт пен кеңістікте жиі-жиі және тұрақты түрде ұшырасып отыратын, заттық болмысы мен құрылымдық сипаттары жағынан өз тұстастарынан біршама анық ерекшеленетін геологиялық денелер жиынтығы" .

Геологиялық формациялардың стратиграфиялық түсінігі: "Белгілі бір уақыт аралығында үздіксіз қалыптасқан түзілімдерді біріктіретін нақтылы стратиграфиялық бірліктер жиынтығы тау жынысытардың формацияларын құрайды".