Георгий Иванович Игишев

Уикипедия — ашық энциклопедиясынан алынған мәлімет
Jump to navigation Jump to search

Георгий Иванович Игишев(1.10.1921, Астана қаласы - 8.07.1943, Ресей, Курск облысы, Поныров ауданы, қазіргі Игишев селосы) - 2-дүниежүзілік соғысқа қатысушы, капитан, взвод командирі.

1940 жылдың қараша айында Кеңес әскері қатарына шақырылды. 1941 жылы 1-Мәскеу артиллерия училищесін бітіріп, Солтүстік-Батыс, Брянск және Орталық майдандарындағы ұрыстарға қатысты. 1943 жылдың 8 шілдесінде Курск доғасында кескілескен ұрыс жүріп жатты. Кошары - Самодуровка шебінің солтүстігінде жаудың 300-дей танкісі мен өздігінен жүретін зеңбіректері төрт топқа бөлініп, 50 ұшақтың қолдауымен Кеңес әскерлерінің позициясына кезекті шабуыл бастаған. Игишевтің зеңбірегіне қарсы 60-қа жуық неміс танкісі лап қойды. Игишев жауынгерлерімен бірге шабуылды тойтарып, алда келе жатқан 4 танкіні қиратты. Жау танкілеріне артиллерия үсті-үстіне оқ жаудырып, 10-нан астам танкіні жойды. Екі рет жараланған Игишев автоматшыларды қарсы шабуылға бастап, немістің жаяу әскерін ығыстырып тастады. Гитлершілердің 19 танкісі мен ондаған әскерін жойды.

Игишевке 233,1 биіктікті қорғағаны үшін КСРО Жоғарғы Кеңесі Төралқасының Жарлығымен қаза болғаннан кейін Кеңес Одағының Батыры атағы берілді (7.8.1943). Игишев өзімен аттас селодағы бауырластар зиратына жерленген. Осы биіктікке (233,1) батырларға арналып ескерткіш орнатылып, Самодуровка селосына Игишев есімі берілген.[1]

Дереккөздер[өңдеу]

  1. А 31 Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет. ISBN 9965-893-73-Х