Демалыс және мәдениет саябақтары

‎ Демалыс және мәдениет саябақтары – қалалық жерлердегі көпшіліктің жұмыстан бос уақытта таза ауада тынығып, демалуына және көңіл көтеруіне арналған бақтар. Олар әдетте, қаланың көлді, бөгенді, көк майса көркем жерлерінде ұйымдастырылады. Белгілі бір мерзім сайын тазаланып, жөнделеді. Гүл, ағаш отырғызылады. Саябақтарда кафе, асхана, кинотеатр, ашық сахна, спорт алаңы, балалар алаңы, түрлі аттракциондар, компьютерленген қызықты ойын автоматтарының павильондары, би алаңдары, ашық эстрадалар, лекторийлер, т.б. мәдени-көпшілік орындар жұмыс істейді. ‎ Ірі саябақтарда мерекелік серуендер, өнерпаздар байқауы, көрмелер, дәрістер, әңгіме-кеңестер, түрлі сипаттағы кездесулер, т.б. жүргізіледі. Қазақстанда ашылған алғашқы Демалыс және мәдениет саябақтарының бірі – Алматыдағы Орталық демалыс және мәдениет саябағы (қазіргі «Ақбота» орталық мәдениет және демалыс саябағы) 1935 ж. ұйымдастырылды.