Евгений Ефимович Михайленко

Уикипедия — ашық энциклопедиясынан алынған мәлімет
Навигацияға өту Іздеуге өту

Евгений Ефимович Михайленко(1921, Қырғызстан, Қарақол қаласы - 18.7.1944, Украина, Львов облысы, Соколь қаласы) - 2-дүниежүзілік соғысқа қатысушы, ұшқыш, аға лейтенант, орыс. 2 жасында ата-анасымен Алматыға қоныстанған. Кеңес әскері қатарына 1940 жылы шақырылған. Орынбор әскери ұшқыштар училищесін бітіргеннен кейін 1-Украина майданы 2- әуе армиясына қарасты 4-гвардиялық штурмдық авиация дивизиясы 92-шабуылдаушы гвардиялық авиация полкі құрамында Ұлы Отан соғысына қатысқан. Алғашқы жауынгерлік тапсырмасын 1942 жылдың көктемінде Калинин майданында бастаған. Ол өзінің «Ил-2» ұшағымен Калинин, кейін Воронеж, 1-Украина майдандарындағы жаудың орналасқан орындары мен қатынас жолдарын талқандап, тапсырмаларды мүлтіксіз орындаумен ерекшеленген. Великие Луки, Белгород, Киев қалалары үшін болған ұрыстарда, сонымен қатар Житомир, Винница, т.б. жерлерді азат етуде жаудың 8 танкісін, 37 автокөлігін, 4 паровозын, 2 оқ-дәрі қоймасын жойған. 1944 жылы 19 сәуірде Михайленконың басшылығындағы «Ил» эскадрильясы жаудың 4 әскери эшелоны және кару-жарақ қоймалары орналасқан Золочек темір жолы станциясын отқа орандырды. Михайленко 115 рет жауынгерлік ұшу сапарында әскер және әскери жүк тиелген 80 автокөлік, 14 танк, 58 вагон, 4 паровоз, т.б. жоюға қатысты. Батыс Украинаны азат ету барысында Михайленко ерлікпен қаза тапты. 1944 жылы 26 қазанда КСРО Жоғарғы Кеңесі Төралқасының Жарлығымен оған Кеңес Одағының Батыры атағы берілді. Ленин, 2 Қызыл Ту, «Қызыл Жұлдыз» ордендерімен, медальдармен марапатталған.[1]

Дереккөздер[өңдеу | қайнарын өңдеу]

  1. А 31 Айбын. Энциклопедия. / Бас ред. Б.Ө.Жақып. - Алматы: «Қазақ энциклопедиясы», 2011. - 880 бет. ISBN 9965-893-73-Х