Еркін ауылы

ЕРКІН — Талдықорған қалалық әкімшілігіне қарасты ауыл. Талдықорған қаласынан шығысқа қарай 1 км жерде, Қаратал өзені аңғарының боз, бетеге өскен қара қоңыр топырақты құрғақ дала белдемінде орналасқан. Тұрғыны 9,7 мың адам (2002). Іргесі 19 ғасырдың аяғында қаланған. Ежелгі атауы Сыдық немесе Садық болған. Ұжымдастыру жылдары (1930) мұнда "Еркін" ұжымшары ұйымдасты. Кейін ол басқа шағын шаруашылықтармен біріктіріп "Қазақстанның 30 жылдардығы" ұжымшары аталған, 1965 жылдан "Еркін" көкөніс-сүт кеңшарының орталығы болды. Оның негізінде 1995 ж. "Береке" агрофирмасы құрылып, 1997 жылдан "Жер-су", "Ақтұма", т.б. ЖШС-тері жұмыс істей бастады. Еркінде тұрмыстық қызмет көрсету мекемелері, орта мектептер, кинотеатр, демалыс үйі, аурухана, т.б. бар. Ауыл маңында Талдықорған қаласының әуежайы орналасқан.