Ертіс жағалауы қорықшасы
| Ертіс жағалауы қорықшасы | |
| Жалпы мағлұмат | |
|---|---|
| Ауданы | 377 055,23 га |
| Құрылған уақыты | 2001 жыл |
| Орналасуы | |
| 52°09′31″ с. е. 76°55′45″ ш. б. / 52.15855901° с. е. 76.92914737° ш. б. (G) (O) (Я)Координаттар: 52°09′31″ с. е. 76°55′45″ ш. б. / 52.15855901° с. е. 76.92914737° ш. б. (G) (O) (Я) | |
| Ел |  Қазақстан |
| Аймақ | Павлодар облысы |
| Аудандар | Ақтоғай ауданы, Железин ауданы, Ертіс ауданы, Тереңкөл ауданы, Аққулы ауданы, Май ауданы |
| Ең жақын қала | Ақсу/Павлодар |
Ертіс өзенінің жайылымы қорықшасы, Ертіс жағалауы қорықшасы – мемлекеттік табиғи кешенді қорық. Қазақстан Республикасы Үкіметінің 2001 жылғы 27 маусымдағы № 877 қаулысымен бекітілген. Қорықтың ауданы 377 055,23 га. Мәртебесі – республикалық маңызы бар мемлекеттік табиғи қорық.
Географиялық орны[өңдеу | қайнарын өңдеу]
Ертіс өзенінің сол жағалауында 1-ден 10-12 км-ге дейін және оң жағалауында 4-6 км-ге дейін созылып, Павлодар облысының Ақтоғай, Железин, Ертіс, Тереңкөл, Аққулы, Май және Павлодар аудандары мен Ақсу және Павлодар қалаларының аумақтарын қамтиды.
Флорасы[өңдеу | қайнарын өңдеу]
Ойпаңды жерлер мен өзен арнасының жайылмасындағы орманды-қатпарлы топырақ жамылғысында шағын орманды алқаптар, шоқ тоғайлар және бұталар өседі. Жайылма ормандарының негізін қара терек, ақ терек, ақ тал, қотыр қайың және т.б. құрайды. Қазақстанның Қызыл кітабына енген өсімдіктер түрлері: сарғыш сарана, ашық құндызшөп, секпіл шолпанкебіс, су жаңғағы, Павлов итмұрыны. Шұбаршөп, орман қырықбуыны, ұсақтұқымды сүттіген, ұзын тегеурінгүл қорық аумағында сирек кездесетін өсімдік түрлеріне жатады.
Фаунасы[өңдеу | қайнарын өңдеу]
Жайылмада сүтқоректілердің 55 түрі (бұлан, еліктер, түлкі, сарышұнақтар, атжалмандар, т.б.) кездеседі. Құстардың 200 түрі, оның 105-і Павлодар қаласының аумағына іргелес жатқан жайылмаға ұя салады. Жайылма суларында балықтардың 20-ға жуық түрі бар, олардың ішінде құндылары: бекіре, сүйрік, сылан, табан балық, көксерке, сазан, т.б. Қазақстанның Қызыл кітабына енген түрлер: қара дегелек, қара тұрпан, жалбағай, қызылжемсаулы қарашақаз, алакөз сүңгуір, ақбас үйрек, аққұйрықты субүркіт, балықшы тұйғын, лашын, сұр тырна, ақбас тырна, үкі. Қызылжемсаулы қарашақаз, алакөз сүңгуір және ақбас үйрек Халықаралық табиғатты және табиғи ресурстарды қорғау одағының тізіміне енгізілген.[1]
Дереккөздер[өңдеу | қайнарын өңдеу]
- ↑ Сайт "Особо охраняемые природные территории Республики Казахстан" https://oopt.kz/