Жануар ақуызы

Жануар ақуызы (орыс. Животный белок) — өте сапалы жануарлардан алынатын ақуыздар. Әсіресе жылумен өңделмеген ақуыздар. Өсімдік ақуыздарында ауыстырылмайтын амин қышқылдары бірнеше болса, жануар ақуыздарында олардың бәрі бар. Сонымен бірге жануар ақуыздары адам организміне өсімдік ақуызынан гөрі жылдам әрі жақсы сіңеді.Жануар ақуыздарын үнемі шамадан асырып тұтыну әдетте нуклеин қышқылдарының көбеюіне ұштасып, организмде пуриндер алмасуы өнімінің — несеп қышқылының жинақталуына себеп болады. Өсімдік ақуыздарының жануар ақуыздарына қарағанда неғұрлым толымсыз екенін ескере отырып, жануар ақуызының белгілі бір бөлігін тұтыну әбден қажет. Ересек адамдар үшін жануар ақуызы үлесі рациондағы ақуыздардың жалпы мөлшерінің орта есеппен 55 пайызына жуық болуға тиіс. Жануар ақуызы жетіспеушілігі әсіресе балаларға ауыр тиеді, олардың өсуі мен ақыл-ойының дамуы тежеледі. Жануар ақуызы негізгі көзі — ет, сүт және сүт өнімдері.