Жезқазған (мақала)

Уикипедия — ашық энциклопедиясынан алынған мәлімет
Jump to navigation Jump to search

ЖезқазғанҚаныш Сәтбаевтың 1935 жылы 4-қазанда «Социалистік Қазақстан» (казіргі «Егемен Қазақстан») газетінде жарияланған мақаласы. Мақалада сол кезеңдегі Кеңестер Одағындағы мыс кені мол шоғырланған, кенді аудандардың мыс қоры жағынан алдыңғы орынды иеленіп отырғаны Жезқазған өңірі, 1935 жылы 1 қаңтарға дейінгі есеп бойынша Қоңыратта 2140 мың тонна мыс, Дектяркада 1510 мың тонна мыс қоры болса, Жезқазған өңірінде сол есеп бойынша 3230 мың тонна мыс бар, оның ішінде барланып зерттелгені - 1330 мың тонна мыс, оның үстіне Жезқазған рудасы таза руданың қатарына қосылатындығы, Жезқазған рудасында алтын, күміс, қорғасын, мырыш өте сирек кездесетіні, висмут, күшәла, тағы басқалары мысқа зиянды қосымшалар жоқтың қасы екендігі айтылады. Осыған орай ғалым «... Жезқазған рудасын оншама кеп шығын шығармай және оңай айырып, нағыз жақсы қара мыс алуға», осыған қоса Жезқазған кенінің табиғи ерекшеліктерін сипаттап, мысты шахтының өзінен де, ашық жұмыс әдісімен де шығаруға болатынын жазады. Ғалым Сәтбаев Жезқазғанның негізгі өндірісіне қажетті шикі металл, отын, құрылыс материалдары өз жерінен алынатынын ескере отырып, Жезқазғанда жеті жылдан бері Қарсақбай комбинатының жұмыс істеп тұрғанын, оның жұмысшылары да жеткілікті түрде жасақталғанын әрі комбинатта тәрбиеленген қазақ жұмысшыларының бой көрсетіп келе жатқанын, өндіріске керекті су және ауыз су мәселесінің де оңды шешім табатынын айтқан.[1]

Дереккөздер[өңдеу]

  1. Қаныш Сатпаев. Энциклопедия / Бас редактор Б.Ө.Жақып. — Алматы «Қазақ энциклопедиясы», 2011 жыл. ISBN 9965-893-74-8