Жоба:Wiki-Бәйге/Жиі қойылатын сұрақтар

Wiki-Бәйге

Шарттары

Жиі қойылатын сұрақтар

Қатысушылар

Талқылау

Wikibilim туралы

Бәйгенің мақсаты не?

Бәйгенің мақсаты қазақ тіліндегі энциклопедиялық мақалалар санын және сапасын арттыру. Ортақ мақсатқа біріккен қазақ тілді қауымдастықты, ортаны қалыптастыру. Қазақ тіліндегі білім қорын қалыптастыру, жастар арасында интеллектуалды хобби ретінде насихаттау.

Бәйгеге қатысу шарттары қандай?

Бәйгеге Уикипедия онлайн энциклопедиясына тіркелген кез келген адам қатыса алады. Ол үшін бәйгеге қатысуға ниет білдіріп, қатысушылар қатарына тіркелсе болды. Бәйгеге тігілген жүз сыйлықты бірін жеңіп алу үшін әр қатысушы кем дегенде 500 сөзден тұратын 100 мақала жазуы керек немесе бір мақала жазып, үздік мақала бәйгесіне қатысуға болады. Бұл туралы таңдаулы мақала бетінде оқи аласыз.

Бәйгеге қалай тіркелеміз?

Бәйгеге тіркелу үшін info@wikibilim.kz поштасына өзіңіздің шын атыңызды, Уикипедиядағы пайдаланушы атыңызды және байланыс деректерін жіберу қажет. Сонымен қатар Уикипедияның өзіндегі Вики бәйге бетіндегі қатысушылар тізіміне өз есіміңізді қосыңыз.

Мен жазған мақалаларды қалай анықтайды?

Уикипедияда жасалатын кез келген өзгертулер мен әрекеттер жазылып қалады. Сондықтан кімнің не істегенін анықтауға болады. Сонымен қатар әр қатысушының үлесі жеке ескеріледі. Өзіңіздің жазған мақалаларыңызды күнделікті тексеру үшін немесе басқа қатысушылар назарына шығарғыңыз келсе жеке бетіңізде тізім жасауға болады.

Жазған мақалаларым жойылып кетпейді ме?

Уикипедияда жазылатын мақалалар мен өзгертулер қауымдастықтың белсенді мүшелерінің тарапынан “жуықтағы өзгертулер” бетінен бақыланып отырады. Сондықтан Уикипедия талаптарына сәйкес келмейтін, яғни энциклопедиялық мақала емес, басқа сайттан көшірілген мәтін немесе дереккөздері жоқ болса жойылып отыруы ықтимал.

Мақаланың көлемі 500 сөзбен шектеле ме?

Толыққанды мақала жазылуы үшін Уикипедия жүйесінде арнайы фильтр орнатылған. Бұл бір –екі сөйлемнен ғана тұратын мақалалардың санын азайту мақсатында жасалды. Әрине 500 сөз дегеніміз стандарт ретінде берілген, сондықтан егер Сіздің мақалаңыз бұл көрсеткіштен көп болатын болса, онда ол мақала сапасының өсуіне септеседі.

Дереккөздерді қалай қоямыз?

Келтірілген әрбір дәйек немесе дерек (факт) соңында сол ақпараттың қайдан алынғандығын көрсету міндетті. Уикипедия жеке пікірлер мен ойлар жазылатын орын емес. Басты талап - келтірілген ақпарат сенімді дереккөздерге сүйенуі керек. Егер сенімді дереккөздеріңіз бар болса, онда оларға сілтеме жасаңыз. Ол үшін мақала ішінде дерек келтірілген сөйлемнен кейін <ref> Дереккөз </ref> белгісін қою қажет. Осы екі белгінің арасына дереккөздің толық атауын беру міндетті.

• кітап үшін: Автордың аты, Кітаптың аты, Баспаның аты, басылған жылы, келтірілген дерекөз алынған бет және ISBN.
• сайт үшін: Сайттың аты, мақаланың аты, сілтемесі және соңғы қаралған күні.
• журнал үшін: Журналдың аты мен саны, шыққан күні, мақаланың аты және авторы, журналдың беті.

Мақаланың тақырыбын қалай анықтаймыз?

Жазатын мақала тақырыбын және бағытын әр қатысушы өзі анықтайды. Мақала тақырыбына қойылатын негізгі талаптар келесідей: мақала қоғам үшін маңызды мәселеге арналуы қажет (белгілі тұлғалар, құбылыстар мен оқиғалар, компаниялар, елді мекендер т.б.), мақаланың аты қысқа болуы керек. Тұлғаларға арналған тақырып келесідей болады: Аты, әкесінің аты, тегі. Егер бір атауға қатысты бірнеше нысан болса, мысалы Астана деп аталатын, онда Астана (қала), Астана (газет), Астана (клуб) деп белгіленуі керек.

Мақаланың тақырыбын ауыстырайын деп едім, оны қалай жасаймын?

Мақаланың атын ауыстыру құқығы Уикипедияға тіркелгеніне 4 күн болған қатысушыларға ғана беріледі. Ол үшін өңдеу бетінің оң жағында тұрған жұлдызшаны басыңыз, жылжыту деген меню көресіз. Сол менюді бассаңыз мақаланың атын ауыстыру бетіне өтесіз.

Мақаламды біреулер өзгертіпті, ол өзгертулерді қалай көре аламын?

Сіз жазған мақала әрқашан Сіздің ғана мақалаңыз болып қалмауы мүмкін. Қауымдастықтың кез келген мүшесі сіз бастаған мақалаға өзгертулер енгізе алады. Мұндай өзгертулер дерекөздерге, келтірілген мысал немесе дерекке, форматқа, безендірілуіне немесе стилистикасына қатысты болуы мүмкін. Мақалаңызға кімнің қандай және қашан өзгертулер жасағанын көру үшін мақаланың жоғарғы оң жағында орналасқан “Тарихы” бетіне өту қажет. Барлық өзгертулер осы жерде көрсетіледі.