Жілік салып шақыру
Жілік салып шақыру - Асқа, тойға, түрлі ойын, тойға шақырудың әдет-салтымызда түрлі-түрлі жолдары бар.
Соның бірі қазіргі заманда тым сирек кездесетін Жілік салып шақыру салты. Мысалы, сүндетке отырғызылатын бала өзінің бәсіре тайына мініп, піскен жамбас, ортан жілік, асықты жілік сияқты кәделі мүшелерді қоржынына салып, жөн білетін жолбасшы ағаларының басшылығымен өзі арнайы шақыратын құрметті азаматтар мен ел ағаларының ауылдарына аттанады. Беттеген ауылына жеткеннен кейін шақыратын кісілерінің үйіне тоқтап, қоржыннан тиісті жілікті алып ұсынып, тойға шақыра келгенін айтады. Мұны шақырылған адам ризалықпен қарсы алып, үйіне түсіреді. Жілік салып шақыру құрметтеу мен сыйластықтың өте жоғары, қадірлі әрі биік түрі. Мұндай шақыру алған туыстар мен құжа-жекжат, нағашылар әлгі баланың сүндет тойына ат, атан жетектеп, саба-саба қымызын артып, салтанатпен барады. Алайда мұндай құрметтеп шақыру бұл күндері ұмытылып бара жатқаны рас.[1]
Дереккөздер[өңдеу | қайнарын өңдеу]
- ↑ Қазақтың салт-дәстүрлері мен әдет-ғұрыптары, Атамұра