Жүйелі талдау

Қысқаша мәлімет[өңдеу | қайнарын өңдеу]

Жүйелі Талдау – 1) кең мағынада, “Жүйелі Талдау” термині кейде жүйелі әдіске балама ретінде қолданылады; 2)тар мағынада – саяси, әлеуметтік, әскери, экономикалық, ғылыми, техникалық, т.б. салалар бойынша күрделі мәселелер шешімін негіздеу және дайындау үшін қолданылатын методологиялық әдістер жиынтығы. Жүйелі Талдау әдістерін қолдану қажеттілігі шешім қабылдау кезіндегі белгісіздік жағдайында белгілі бір нұсқаны таңдауға тура келетіндігімен байланысты. Жүйелі Талдау әдістері мәселені шешудің балама жолдарын іздестіруге және сол жолдардың әрбір нұсқасы бойынша белгісіздік көлемін анықтауға, сондай-ақ, оларды тиімділік өлшемдері бойынша өзара салыстыруға бағытталады. Жүйелі Талдау әдістерін пайдаланудың ұдайы күшейіп, кеңейе түсуі аса маңызды проблемаларды шешудегі бағдарламалық тәсілдің кең тарала бастауымен тығыз байланысты. Жүйелі Талдауды іс жүзінде қолданудың алғашқы тәжірибелері 20 ғасырдың 20-жылдарынан басталғанымен, сол ғасырдың 50-жылдарынан бері барлық салаларда, оның ішінде мемлекеттік басқару ісімен, жаңа технологияларды игеру және дамытумен байланысты проблемаларды шешу кезінде пайдаланылатын болды. Жүйелі Талдаудың негізі жалпы жүйелер теориясы мен жүйелі әдіс болып табылады. Жүйелі Талдау әдістерін қолдану кезінде: шешім қабылдау процесі түпкі мақсатты нақты түсініп білу мен оны айқын қоюдан басталуы; барлық проблемалар бір бүтін, бірыңғай жүйе ретінде қарастырылып, жекелеген шешімдердің өзара байланысы мен соңғы салдары айқындалуы; мақсатқа жетуге мүмкіндік беретін өзге де балама жолдарды айқындап, оларға талдау жасалуы; жекелеген бөлімдердің мақсаты бүкіл бағдарлама мақсатына қайшы келмейтіндей болуы қажет. ^[1]