Зайсанбалық

Зайсанбалық– Шығыс Қазақстан облысы, Приозерный кентіндегі балық аулаумен және өндеумен шұғылданатын кәсіпорын. 1930 жылдан бастап жұмыс істейді. 1934 жылы балық тресі, 1959 жылы Зайсан балық комбинаты, 1976 жылы Зайсан балық бірлестігі, 1993 жылы “Зайсанбалық” акционерлік қоғамы деп аталды. “ Зайсанбалық” акционерлік қоғамының құрамына Бұқтырма балық зауыты, Күршім балық өсіру зауыты, Өскемен тоған шаруашылығы енеді. Мұнда 2 балық өңдеу зауыты, моторлы балық аулау станциясы, сыйымдылығы 500 т тоңазытқыш, тәулігіне 4 т ыстаған балық шығаратын цех, бөшке-жәшік даярлайтын, құрал-сайман жөндейтін, т.б. қосымша өндіріс цехтары бар. “Зайсанбалық” балықшылары Бұқтырма су қоймасынан, Марқакөлден, Қара Ертістен балық аулайды. Негізгі аулайтын балықтары: сазан, көксерке, табан, шортан, алабұға, тұқы, лақа, торта. 1997 жылы 7 мың т балық ауланды. Күршім балық өсіру зауыты мен Өскемен тоған шаруашылығы табиғи балық қорын толықтырумен шұғылданады.