Зарядтық түйіндестік

Зарядтық түйіндестік (С) – қандай да бір өзара әсерге қатысатын барлық бөлшекті олардың өздеріне сәйкес антибөлшекпен ауыстыратын амал (операция). Тәжірибе зарядтық түйіндестік кезінде күшті және электрмагниттік өзара әсерлердің өзгермейтіндігін көрсетті, яғни күшті және электрмагниттік өзара әсерлердің бірдей күйде тұрған бөлшектері мен антибөлшектері бірдей болады. Бұл жағдай күшті не электрмагниттік өзара әсердің әсерінен қандай да бір бөлшекте өтетін кез келген процеске, оның антибөлшегінде де дәл сондай болып өтетін процесс сәйкес келетіндігін дәлелдейді. Бөлшекті оның антибөлшегіне ауыстырған кездегі күшті және электрмагниттік өзара әсерлердің симметрия заңдарынан шын бейтарап бөлшектер (немесе жүйелер) үшін зарядтық жұптылық сақталады деген қорытынды шығады. Ал көптеген ыдырауларға себепші болатын әлсіз өзара әсерде зарядтық түйіндестікке қарағанда симметрия сақталмайды.