Зәмзә Қадылшанұлы Қырықбаев

Зәмзә Қадылшанұлы Қырықбаев
Туған күні	16 мамыр 1942 (1942-05-16)
Туған жері	Ақбұлақ ауылы, Марқакөл ауданы, Шығыс Қазақстан облысы, Қазақ КСР
Қайтыс болған күні	31 мамыр 2024 (2024-05-31) (82 жас)
Азаматтығы	КСРО  Қазақстан
Марапаттары мен сыйлықтары

Зәмзә Қадылшанұлы Қырықбаев (16 мамыр 1942, Ақбұлақ ауылы, Марқакөл ауданы, Шығыс Қазақстан облысы, Қазақ КСР — 31 мамыр 2024) — Өскемен қаласының №1 автобус паркінің автобус жүргізушісі, қоғам қайраткері. Еңбек Даңқы орденінің толық иегері.

Өмірбаяны

1942 жылы 16 мамырда Қазақ КСР Шығыс Қазақстан облысы Марқакөл ауданы Горное ауылында дүниеге келген.

Ол ата-анасынан ерте айырылып, ағасы мен апайының талабымен Шығыс Қазақстан облысы Өскемен қаласына қоныс аударады. Сол жерде Жамбыл мектеп-интернатын, 1960 жылы №1 автобус паркі қарамағындағы жүргізушілер курсын бітіріп, одан кейін 47 жыл жүргізуші болып Қазақстандағы ең атақты автокөлік кәсіпорнының еңбек даңқын лайықты көтеріп, арттырды. Бір жарым жыл бойы 7-бағыттағы жиырма орындық «КАВЗ» автобусында жүрді, содан соң № 8, 10, 24, 25 бағыттарда жұмыс істеді. Бірақ оның ең сүйікті бағыты қалалық өзен бекеті мен «Защита» теміржол станциясы арасында жүретін № 19 бағыты болды. 1964-1967 жылдары Кеңес Әскері қатарында әскери борышын өтеді. Қарулы Күштер қатарынан босатылғаннан кейін бұрынғы жұмыс орнына оралды.

Ол үнемі озат жұмысшылардың қатарында болып, жылжымалы құрамның жөндеусіз жүрісін ұлғайту жолындағы жарыстың бастамашысы болып, бағыттардың апатсыз жұмыс істеуіне өз үлесін қосты. Ұзақ жылдар бригадирдің орынбасары қызметін атқарып, кейін 19-бағыттық бригаданың басшысы болды. 20 жылдай ұжымды басқарып, өзінің алғашқы бригадирінің абыройы мен даңқын одан әрі нығайтты. Көп жылдар бойы рөлде үздіксіз жұмыс істеген ол қаланың автобус бағыттарында 5 миллионнан астам адамды тасымалдады. Осы жылдар ішінде жүріп өткен жолдың ұзындығы жер шарын төрт рет қоршап алатын шексіз таспаның ұзындығына тең болар еді. 100-ден астам жүргізушіні кәсіби жұмысқа дайындады.

КСРО Жоғарғы Кеңесі төралқасының 1975 жылғы 22 сәуірдегі және 1981 жылғы 2 сәуірдегі жарлықтарымен III және II дәрежелі «Еңбек Даңқы» ордендерімен марапатталды.

КСРО Жоғарғы Кеңесі төралқасының 1986 жылғы 14 ақпандағы Жарлығымен Зәмза Қадылшанұлы Қырықбаев I дәрежелі «Еңбек Даңқы» орденімен марапатталды. Еңбек Даңқы орденінің толық иегері атанды.

2007 жылдан бастап — лайықты демалысқа шықты. Қоғамдық қызметпен айналысады: облыстық, қалалық соғыс және еңбек ардагерлері кеңесінің мүшесі, облыс ақсақалдар кеңесінің мүшесі.

Өскемен қаласында тұрды.

Марапаттары

• III дәрежелі Еңбек Даңқы ордені (22.04.1975)
• II дәрежелі Еңбек Даңқы ордені (02.04.1981)
• I дәрежелі Еңбек Даңқы ордені (14.02.1986)
• Өскемен қаласының Құрметті азаматы (27.12.2001)
• Автомобиль көлігінің құрметті қызметкері