Ибн әл-Факих

Ибн әл-Факих, Әбу Бакр Амед ибн әл-Хамауани (туған-өлген жылдары белгісіз) – 9 – 10 ғасырларда өмір сүрген араб географы. Ол 902 жылы «Китаб ахбар әл-булдан» (Елдер туралы әңгімелер кітабы) атты еңбек жазған. Шығарманың түпнұсқасы 2 мың парақтан (5 том) тұрған. Кітаптың Орта Азия географты жөніндегі бөлімдерінде оғыздардың, кимектердің, т.б. түркі халықтарының қоныстануы мен әдет-ғұрпы туралы мәліметтер кеңінен келтіріледі. Бұл мәліметтерді автор Тамим ибн Бахр, Ибн Хордадбектің еңбектерінен алған. Еңбекте сауда жолдары баяндалған, Сырдария алабындағы қалалар мен қыстақтардың, Тараз аймағындағы елді мекендердің тізімі берілген. Сонымен бірге онда Тараз қаласынан кимек еліне шығатын сауда жол сипатталады. Ибн әл-Факих еңбегі ортағасырлық Шу мен Талас өңірлерінің, Тараз қаласының тарихын зерттеуде маңызды тарихи дерек болып табылады.