Иван Васильевич Кутурга

Иван Васильевич Кутурга(1924 жылы туған, Павлодар облысы,Ертіс ауданы,Добромысловка селосы) - 2-дүниежүзілік соғысқа қатысушы, сержант, зеңбірек расчетінің командирі, кейіннен подполковник. 1942 жылдың қыркүйегінде Кеңес әскері қа- тарына шақырылып, Орел жаяу әскер училищесіне жіберілді. 1943 жылы құрамында Кутурга бар курсанттар Брянск майданына аттанды. Олар Беларусь және Прибалтика жерінен ұрыспен өтті. Тильзит, Кенигсберг, Данциг және т.б. қалаларды алуға қатысты. 1945 жылдың басында 235-Витебск атқыштар дивизиясының 682-артиллерия полкі Шығыс Пруссияда қызу ұрыс жүргізді. Полкте Кутурга зеңбірек нысанашысы болды. 20 қаңтарда жауды өкшелей қуып, оныц батареясы Грос-Фридрихсдорф деген жерде бір батальон жаяу әскері бар жау тосқауылына тап болды. Кутурга зеңбірегімен жаудың жаяу әскеріне оқ жаудырып,50-ге жуық гитлершіні өлтірді. Лабиау қаласы маңында Кутурга зеңбірегімен атып, жаудың бірнеше танкісін жойды. 1945 жылдың 19 наурызында болған ұрыста жаудың 3 танкісін қиратып, көпірді талқандады. 1945 жылы сәуірдің 6-сынан 9-ына дейін 235-атқыштар дивизиясы Кенигсберг қаласына шабуыл жасауға қатысты. Осы ұрыста Кутурганың расчеті жаудың 8 станокты пулеметін, бір бронетранспортерін және 20-дан астам әскерін жойды. Кірпіш зауытында болған ұрыста ол жаудың 4 зеңбірегін, 30-дан астам әскерін жойды. Кенигсбергке шабуыл жасауға қатысқаны және ұрыста ерлік көрсеткені үшін Кутургаға КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (19.4.1945). Соғыстан кейін Кеңес әскері қатарында қызметін жалғастырды. 1964 жылы подполковник Кутурга запасқа шықты. Баку қаласында тұрып, мектепте алғашқы әскери дайындық пәнінен сабақ берді.