Иван Григорьевич Сапалев

Иван Григорьевич Сапалев(20.9.1912, Шығыс Қазақстан облысы,Көкпекті ауданы,Московка селосы - 27.2.1976, Алтай өлкесі, Бийск қаласы) - 2-дүниежүзілік соғысқа қатысушы, кіші сержант, бөлімше командирі,орыс. Кен орнында жұмыс істеген. 1942 жылы Кеңес әскері қатарына алынып, майданға келді. 603-батальонның (Орталық майдан 13-армия 322-атқыштар дивизиясы) бөлімше командирі кіші сержант Сапалевтің болімшесі 1943 жылдың қыркүйегінде кеңес жауынгерлерінің Сейм, Десна, Днепр өзендерінен өтуіне мүмкіндік жасады. Пекарево және Новые Млины (Полтава облысы) селолары тұсында Сапалевтің бөлімшесі дивизияның артиллериялық бөлімінің Сейм өзенінен қалқыма өткел арқылы өтуін қамтамасыз етті. Надиховка деревнясы (Чернигов облысы) тұсында Десна өзенінен пароммен дивизияның негізгі бөлігін қысқа уақыт ішінде өткізді. Любеч қаласының оң жағында (Гомель облысы) Днепр өзенінен жүзіп өтіп, жақын жердегі окоптардағы жау әскерін қуып шықты. Басып алған жау шебіне бекініп, жаяу әскер бөлімшесінің өзеннен өтуіне мүмкіндік жасады. Осы ұрыстағы ерлігі үшін Сапалевке КСРО Жоғарғы Кеңесі Төралқасының Жарлығымен Кеңес Одағының Батыры атағы берілді (16.10.1943). Соғыс аяқталғаннан кейін туған жеріне оралып, кен орнында, кейін Алтай өлкесінің Бийск қаласына қоныс аударып, кұрылыс-жөндеу тресінде тас калаушылар бригадирі болып жұмыс істеді. 2 рет Ленин, «Қызыл Жұлдыз», 3-дәрежелі Даңқ ордендерімен, медальдармен марапатталған.