Инамалық

Инамалық – Хиуа хандығында өзбек тайпаларының жетекшілеріне берілген лауазым.

Инамалық елдің билеушісіне аса жақын адам ретінде жоғары қызметтер атқарып, кейде мемлекетті басқарған. Хорезмнің өзбек тайпалары негізгі 4 топқа (қият-қоңырат, ұйғыр-найман, қаңлы-қыпшақ, нүкіс-маңғыт) бөлінді. Бұл күрделі этникалық бірлестіктерді 4 инамалық басқарды. Елдің саяси өмірінде, әсіресе, оның кейінгі кезеңінде инамалық шешуші рөл атқарды. 1763 жылдан кейін қоңырат тайпасының басшысы Мұхаммед Әмин инақ ықпалды мемлекет басшысы ретінде айрықша беделге ие болды. Инамалықтар алғашқы кезде қазақ халқының арасындағы Шыңғыс хан тұқымынан сайланды да, ешбір беделі жоқ хандардың атынан хандықты билеп келді. Инамалықтар ханды өздері тағайындап, хан жарлығы дегенді құр желеу еткенмен, шын мәнінде бар билікті өздері жүргізді. Мұндай жағдай ұзаққа созылмады. 19 ғасырдың бас кезінде Мұхаммед Әмин инақтың немересі – Елтізар инақ соңғы беделсіз ханды құлатып, хан тағына өзі отырды (1804 – 06), сөйтіп ол Қоңырат атанған жаңа хандық әулеттің негізін құрды.