Ионосфера институты

Ионосфера институты, Қазақстан Республикасы Білім және ғылым министрлігінің Ионосфера институты, Қазақстан ғылым академиясының Президиумы жанындағы Ионосфера секторы (1961 ж.) негізінде 1983 ж. ұйымдастырылған.

Қазақстан ғылым академиясының ионосфера секторы негізінде 1983 жылы Ионосфера институты құрылды. Институттың негізгі ғылыми-зерттеулерінің бағыты – Күн мен Жер байланыстары физикасы. Институт ғалымдары іргелі және қолданбалы зерттеулер бойынша елеулі ғылыми нәтижелерге қол жеткізе алды. Олардың ішінде мынадай жетістіктерді атап өту қажет: орта ендікті ионосфераның динамикалық процестерінің толқындық табиғаты тұжырымдамасы жасалды; табиғи және антропогендік құбылыстар (Күн қызуы, Жер сілкіністері, өнеркәсіптік және ядролық жарылыстар, космостық аппараттарды ұшыру және т.с.с.) әсер еткен кездегі литосфера – атмосфера – ионосфераның өзара әрекеттестігі жете зерттеліп, оларды қашықтан анықтаудың жаңа радио- және геофизикалық әдістері табылды. Институт ғалымдары «Мир» орбиталық станциясының бортында Қазақстан ғарышкерлері (Т.О.Әубәкіров пен Т.А.Мұсабаев) жүргізген ғылыми зерттеулер бағдарламасын жасау мен іске асыруға қатысты. Ресей, АҚШ, Ұлыбритания, Канада, Франция, Үндістан мен Чехияның ғыл. мекемелерімен ғылыми және шығармашылық байланыстар жолға қойылған. Соңғы жылдары 29 ғалым халықаралық конференцияларға қатысты. Конкурс нәтижелері бойынша институт ІNTAS (2 грант), НАТО (2 грант), CRDF (1 грант), EOARD (2 грант),Сорос (6 грант), Қазақстан Республикасы ғылыми қорының (10 грант) гранттарына ие болды. Институттың 6 қызметкері Америкадағы Геофизиктер одағы мен Математикалық қоғамының мүшелері. ҚР-ның Энергетика және минералды ресурстар министрлігімен және т.б. жасалған шаруашылық келісімшарттары бойынша орындалған ғылыми-зерттеу жұмыстарының нәтижелері іске асырылуда. Өнертабыстарға 47 авторлық куәлік алынды.