Йосемит ұлттық саябағы

Йосемит ұлттық саябағы, АҚШ-тың Калифорния штатындағы Сьерра-Невада тауында орналасқан. 1890 жылы құрылған. Аум. 3080 км². Саябақта көрікті табиғат нысандары, орманды алқаптар, биік сарқырамалар, Альпі шалғыны, ашық жерлер, мұздықтар, көлдер көптеп кездеседі. Саябақ жеріндегі гранитті биік жартастар тұтас орманға ұқсап алыстан көз тартады. Ондағы ең биік тау – Лайелл, оның биіктігі 3990 м. Йосемит ұлттық саябағында Солтүстік Америкадағы ең биік әрі ең үлкен Йосемит сарқырамасы (биіктігі 739 м) бар. Саябақтың құрамына ұызндығы 11 км-ге созылатын Йосемит өзенінің терең аңғары да кіреді. Мұнда секвойя ағаштары өскен үлкен үш алқап бар. Кейбір секвойя ағаштары өте ертеден өсіп келеді. Ондағы “Қарт гризли” ағашының жасы 2700 жылдан кем емес деп есептелінеді. Саябақта өсетін секвойя – Сьерра секвойясы (Sequoіadendron gіganteum) деп аталады. Жануарлардан: барибал, қарақұйрықты бұғы, құстың 200-ден астам түрі кездеседі. Саябақтың табиғаттың төл қалпын сақтауда маңызы зор. Осы әдемі көріністі көріп, тамашалау үшін Йосемит ұлттық саябағына жыл сайын мыңдаған туристер легі ағылып келіп жатады.