Кадриль

Кадриль (франц. quadrіlle, исп. cuadrіlla – төрт адамнан құрылған топ; лат. quadrum – төртбұрыш) – еуропалық халықтар арасында кең тараған би түрі. 17 ғасырдың аяғы мен 19 ғасырдың аяғына дейін ең танымал бал билерінің бірі болған. Музыкалық өлшемі 2/4. Кадриль жеке аты бар және өзіне тән музыкамен сүйемелденетін 5 – 6 фигурадан тұрады. Халық тұрмысына кіргенімен кадриль өзінің композициялық ерекшеліктерін сақтаған. Бірақ оның әуені мен орындаушылық мәнері ұлттық нақышқа ие болды. Әр түрлі атпен кадриль орыс, украин, беларусь, литва, латыш, эстон халық биі ретінде сақталған.

Кадрильді әдетте төрт жұп шаршы (каре) құрып билейді. Ол көбінесе әрқайсысының жеке атауы және өзіне тән музыкамен сүйемелденетін 5, кейде 6 фигурадан тұрады. Фигуралардың реті әдетте тұрақты болды. Ең танымал фигуралардың атаулары: Le Pantalon («Панталон»), L’été («Жаз»), La Poule («Тауық»), La Pastourelle («Бақташы қыз»), La Trénis (биші Треництің құрметіне) және Finale («Финал»).

Сілтемелер

«Қазақстан»: Ұлттық энцклопедия / Бас редактор Ә. Нысанбаев – Алматы «Қазақ энциклопедиясы» Бас редакциясы, 1998 ISBN 5-89800-123-9, IV том