Кеншімбай мен Ақсұлу айтысы

“Кеншімбай мен Ақсұлу айтысы ” – айтыстың көркем үлгілерінің бірі. Айтыс шамамен 1890 жылы Ор өзенінің бойында болған. Кеншімбай Қабанұлы (1865 – 1925) Сыр бойындағы байұлы тайпасының жаппас руынан шыққан. Жетіру тайпасының жағалбайлы руынан шыққан Ақсұлу Орысбай қызы(1873 ж.т. – ө.ж.б.) суырып салма өлеңге жүйрік, аты мәлім ақын болған. Екеуі үлкен бір тойда кездесіп айтысады. Ақсұлудың сөйлер сөзге еркін, тапқыр да алғыр ақын екенін білген Кеншімбай жұрттан алдын-ала сұрастырып, қыздың күйеуінің тым жастығын бетке басып жеңеді. Айтыс қалыпты ру айтысы болып басталса да, дами келе үлкен әлеуметтік мәні бар мәселелерді көтереді, ел ішіндегі кейбір әділетсіздік жайы сөз болады. Айтыс әлеуметтік мәнінің өткірлігімен қатар, көркемдік сөз кестесі жағынан да бағалы.