Керамзиттік шикізат кен орны

Керамзиттік шикізат кен орны - Орал қаласының солтүстік-батысында 48 км, Погодаев ауылының оңтүстік-батысында 1,5-2 км қашықтықта орналасқан кен орны. 1971 жылы пайдалануға берілді.

Геологиялық құрылымы

Жоғарғы пайдалы қабатына саз, төменгісіне бор түзілген. Саздың түсі қара-сұр, қара, тығыз, қолға ұстағанда майлы. Жоғарғы саз қабаттары көлбеу күйінде батыстан солтүстік-батысқа, шығыстан оңтүстік-шығысқа дейін созылған 1 км жерді, ені — 0,4-0,7 км жерді алып жатыр.

Жатыс сипаты

Пайдалы қабатының қалыңдығы 2,5-25,0 км, орташа қалыңдығы - 16,5 м, ауданы — 0,55 км². Мұндағы саздан t-1120-1130°С-та 10-20 мм керамзиттік қиыршық тас фракциясын алуға болады. «А» класына жататын 350-400 маркалы керамзитті қиыршық тас мемлекеттік стандарт талабына сай келеді. Арнаулы ғылыми зерттеу институтының қорытындысы бойынша керамзитті қиыршық тас:

• салмағы 476, 500; 526 кг/м³ жылу жібермейтін керамзитті бетонды;
• 50-75 маркалы, салмағы 906, 920 кг/м³ жылу жібермейтін керамзитті бетонды;
• 100, 150, 200 маркалы, салмағы 1251, 1294, 1314 кг/м³ керамзит бетонды өндіруге пайдаланылады.

Керамзитті саздың артық бөлігі А+В+С — 6181,0 мың м³ категориясы бойынша 3 КТГУ-мен бекітілген.