Кешірім жасау

Кешірім жасау– Мемлекеттік жоғары билік органдарының не мемлекеттегі ең жоғары лауазым иесінің сотталушыны қылмыстық жазадан толық, немесе, ішінара босатуы, не оған сот белгілеген жазаны жеңілдетуі. Қазақстан Республикасы Конституциясының 15-бабының 2-тармағына сәйкес, ерекше ауыр қылмыс жасағаны үшін ең ауыр жаза – өлім жазасына кесілген адамға Кешірім жасау туралы арыздану құқығы берілген. Конституцияның 44-бабының 15-тармағына сәйкес азаматтарға Кешірәм жасау актісін Қазақстан Республикасы Президенті шығарады. Қазақстан Республикасы Қылмыстық Кодексінің 76-бабы бойынша, белгілі бір жеке адамға ол жөніндегі айыптау үкімі заңды күшіне енген жағдайда Кешірім жасау туралы актіні Қазақстан Республикасы Президенті қабылдайды. Кешірім жасау кезінде сотталушы жазасын одан әрі өтеуден босатылуы, не оған тағайындалған жаза қысқартылуы немесе жазаның неғұрлым жеңіл түрімен ауыстырылуы ықтимал. Сондай-ақ, жазасын өтеген адамнан Кешірім жасау актісі мен соттылықтың алынып тасталуы мүмкін.