Краснояр табиғат ескерткіші

КРАСНОЯР ТАБИҒАТ ЕСКЕРТКІШІ, Солтүстік Қазақстан облысы Қызылжар ауданы Краснояр а. маңында орналасқан. Есіл аңғарының оң жағалаулық жыраларымен тілімденген. Облыстағы құрып кету жағдайында тұрған орхидейлік (сүйсіндік) өсімдіктер өсетін жалғыз жер. Бұған шолпаншаш кебісгүлінің үш түрі: ірігүлді, нағыз және теңбілдісі жатады. Олар Қазақстанның «Қызыл кітабына» енгізілген. Сирек кездесетін басқа өсімдіктерден бұйра лалагүл, екі үйлі мысықтабан, қырыққұмақты қыран от, лалагүлді қоңырауша, дөңгелек жапырақты алмұртша, шұбар инек, жұмсақ балқурай, орман аюбалдырғаны, құлмақ, т.б. анықталды. Жер бедерін едәуір дәрежеде делювиймен жабылған неогеннің кешенді тау жыныстары шөгінділері қалыптасқан. Ескерткіш 1982 жылдан облыстық мәндегі ботаникалық қорықша саналады.‎