Кредит өтеу қабілеті

Кредит өтеу қабілеті.

Кредит өтеу қабілеті – кәсіпорынның қаржы жағдайының сипаттамасы; кәсіпорынның, компанияның, фирманың кредитті қарыз ауыртпалығына ұшырамай қабылдау және ол бойынша мерзімінде толық есеп айырысу қабілеті, яғни қарызгердің (қарыз алушының) кредит алумен қатар оны қайтару қабілеті. Кредит өтеу қабілеті қарызгерді сипаттайтын мынадай көрсеткіштермен: қарызгердің бұрын алынған кредит бойынша есеп айырысу кезіндегі ұқыптылығымен: оның ағымындағы қаржы жағдайымен; бұл жағдайдың келешекте өзгеруімен; қажет болған жағдайда басқа көздерден ақшалай қаражатты жұмылдыру қабілетімен, тағы басқа мүмкіндіктермен айқындалады. Сондықтан Кредит өтеу қабілетін талдаудың мәні кәсіпорын өзінің мойнына алған міндеттемелері бойынша өзінің қаржы құрылымы өзгермеген жағдайда, қандай активтермен және қай мерзімде қарызын өтей алатынын анықтау мүмкіндігін есептейтін нормаларды жүйелеуде. Бұл жүйе үш норманы қамтиды, олар: а) ақша қорларының нормасы – кәсіпорынның қысқа мерзімді берешектің қандай үлесін дереу өтей алатынын көрсетеді; ә) өтемпаздық нормасы – дебиторлармен уақытылы есеп айырысу жағдайында кәсіпорынның қысқа мерзімді кредит пен кредиторлық берешек бойынша төлем төлеу мүмкіндіктерін сипаттайды; б) өтеу нормасы – кәсіпорынның тек тез сатылатын активтерді ғана емес, сонымен бірге материалдық айналым құралдарын да өткізу есебінен неғұрлым мерзімді міндеттемелерді өтеу мүмкіндіктерін сипаттайды..