Күрделі жұмсалымның тиімділігі

Күрделі жұмсалымның тиімділігі - күрделі жұмсалымнаң алынатын тиімділіктің (нәтиженің) осы жұмсалымның көлеміне қатынасы. Күрделі жұмсалымның нәтижесіне және бағыттылығына қарай экономикалық, әлеуметтік, экологиялық нәтижелілік түрлеріне бөлінеді. Күрделі жұмсалымның экономикалық тиімділігі — өнім шығарылымы өсімінің, пайда өсімінің осы өсімге себепші болған күрделі жұмсалымға қатынасы. Әлеуметтік тиімділік— алынатын әлеуметтік игіліктердің, көрсетілетін әлеуметтік қызметтердің осы игіліктер мен қызметтерді қамтамасыз еткен күрделі жұмсалымға қатынасы. Экологиялық тиімділік — сыртқы орта күйінің жақсаруы көрсеткіштерінің осы жақсаруды туғызған күрделі жұмсалымға қатынасы. Күрделі жұмсалымның тиімділігі ел, аймақ, сала бойынша, инвестициялық, экономикалық, әлеуметтік, экономикалық бағдарлама бойынша, кәсіпорындар тобы (қауымдастықтар, өнеркәсіптік топтар) бойынша, жекелеген кәсіпорындар, бағдарламалар бойынша айқындалады. Макродеңгейде болжалды (үміт етілген) және нақты (іс жүзіндегі) күрделі жұмсалымның тиімділігі, микродеңгейде жобалық және нақты күрделі жұмсалымның тиімділігі түрлеріне бөлінеді.Ел бойынша, аймақ бойынша мына көрсеткіштер есептеледі: ЖІӨ-нің, ұлттық табыстың, өндірістік аяға күрделі жұмсалымның теңгесіне шаққандағы пайданың өсімі, күрделі жұмсалымның өтелу мерзімі. Сала бойынша өнім шығарылымының, күрделі жұмсалымның теңгесіне шаққандағы пайданың өсімі, күрделі жұмсалымның өтелу мерзімі есептеледі. Кәсіпорындар бойынша нақты күрделі жұмсалымның тиімділігі күрделі жұмсалымның табыстылығымен, оның өтелу мерзімімен айқындалады. Мұнда күрделі жұмсалым туғызған өсім осы күрделі жұмсалымның өзімен салыстырылады.