Көкпар биі

“Көкпар” – қазақ халқының ұлттық биі. Ат үстінде көрсетілетін ұлттық спорт ойындарын (көкпар, бәйге, аударыспақ, т.б.) бейнелейді. Халық күйі “Қара жорғаның” сүйемелінде орындалады. Музыка өлшемі 4/4, ырғағы өте екпінді.

Алғаш рет 1934 ж. Қазақстан ауыл шаруашылық еңбекшілерінің слетінде халық бишісі Ш.Быжыбаев жеке, ал 1936 ж. Мәскеуде өткен КСРО халық бишілері слетінде бір топ бишілермен орындады. Бұл бидің сахналық нұсқасын Бүкілодақтық ән-би ансамблі өз репертуарына енгізді (1936 – 37 ж., А.И. Моисеевтің қоюы бойынша). “Көкпар” биінің жаңа нұсқасын 1953 ж. балетмейстер Д.Әбіров Қазақ филармониясында қойды. Қазақ ән-би ансамблінің бишілері (балетмейстері Л.Д. Чернышева) Көкпаp биін 1958 ж. Мәскеуде өткен Қазақ әдебиеті мен өнерінің онкүндігінде, 1959 ж. АҚШ-та орындады.