Ларусс энциклопедиясы

Ларусс энциклопедисы — Ларусс баспасынан шыққан анықтамалықтар. 1852 ж. Парижде педагог және лексикограф П.Ларусс (1817 — 75) ұйымдастырған.

“19 ғасырдың Ларусы” аталып кеткен 15 томдық “19 ғасырдың үлкен әмбебап сөздігі” 1865 — 76 ж. (1878 және 1888 ж. 2 қосымша томы) жарық көрді. Онда гуманитарлық тақырыптағы мақалалар басым болды, жеке әдеби және музыкалық шығармаларға елеулі орын берілді. 1897 — 1904 ж. “7 томдық жаңа суретті Ларусс”, 1906 ж. қосымша томы, 1927 — 33 ж.' “19 ғасырдың 6 томдық Ларусы”, 1948 — 50 ж. қайта өңделген басылымы, 1953 ж. қосымша томы шықты. 1960 — 64 ж. “10 томдық үлкен энциклопедиялық Ларусс” (қосымша томы 1968 ж.) жарық көрді. Мақалалары қысқаша анықтамалық сипатта болғандықтан энциклопедияға 450 мыңнан астам термин енген. 1906 жылдан бастап түсіндірме және энциклопед. сөздіктерден құралған бір томдық “Кіші Ларусс” жыл сайын шығып тұрды. Шағын энциклопедиялардан: “Ларусстың жүйелі энциклопедиясы” (1955), Ларусс. Бояулы үш томдығы (1965 — 66), “Ларусстың 3 томдық жалпыға бірдей энциклопедиясы” (1968), екі томдық “Жаңа әмбебап Ларусс” (1969 — 70), балалар мен жастарға арналған энциклопедиялық сөздіктер, музыка, медицина, ауыл шаруашылығы, бау-бақша, үй шаруашылығы, спорт, т.б. бойынша энциклопедиялар жарық көрді.