Луврдағы ұрлық (2025)
2025 жылғы 19 қазанда Париждегі Лувр мұражайында ұрлық орын алды. Таңғы сағат шамамен 9:30-да қылмыскерлер терезе арқылы Денон қанатындағы №705 «Аполлон галереясына» (мұнда патша әшекейлері мен сәндік-қолданбалы өнер туындылары сақталады) кіріп, екі әйнек витринаны сындырған. Бастапқы мәлімет бойынша, олар кем дегенде тоғыз зергерлік бұйымды ұрлап кеткен.[1]
Бастапқы бағалау бойынша, ұрлық төрт-жеті минуттың ішінде жасалған. Ұрылар Сена өзені жағынан, құрылыс жұмыстары жүріп жатқан бөліктен ғимаратқа кірген. Мұражайға ену үшін жүк көлігі, құрылыс көтергіші мен темір кескіш құрал пайдаланылған. Le Parisien газетінің хабарлауынша, қылмыскерлер құрылысшы киімін және сары шағылыстырғыш жилет киген. Францияның ішкі істер министрі Лоран Нуньестің айтуынша, қылмыс «алдын-ала барлап, өте жылдам әрекет еткен тәжірибелі топ» тарабынан жасалған.[2]
Дәлелдер мен айғақтарды сақтау және тергеушілер мен сарапшылардың жұмысын қамтамасыз ету мақсатында Лувр мұражайы толық бір күнге жабылды, ал барлық келуші ғимараттан шығарылды.[1]
Көп ұзамай, мұражай маңындағы көшеден III Наполеонның жұбайы, императрица Евгенияға тиесілі тәж табылды. XIX ғасырда жасалған бұл алтын тәж 1354 гауһар мен 56 зүбаржатпен әшекейленген, алайда табылған кезде оның сынғаны анықталған.[1]
Бұл — Луврдан өнер туындысының XXI ғасырдан бергі алғаш ұрланғаны болды. Бұған дейін 1998 жылғы 3 мамырда Камиль Короның «Севр жолы» атты картинасы ұрланған болатын.
Францияның мәдениет министрі Рашида Дати ұрлық туралы жаңалықты әлеуметтік желілерде алғаш жариялап, «Бүгін таңертең Лувр ашылған кезде тоңау орын алды» деп жазды және зардап шеккендер жоқ екенін хабарлады. Францияның ішкі істер министрі Лоран Нуньес әлеуметтік желілерде «Луврға жасалған шабуыл — тарих пен біздің мұрамызға жасалған шабуыл» деп мәлімдеді.
Ұрланған бұйымдар
_(7166066743).jpg)
1853 жылы III Наполеон пен Евгения Монтихоның некесінен кейін көп ұзамай Парижде жасалған. Диадема алтын жалатылған күмістен дайындалып, 212 інжу-маржанмен (соның ішінде 17 алмұрт пішінді), 1998 бриллиантпен және 992 раушан қырлы алмазбен безендірілген.[3]
1855 жылы зергер Поль-Альфред Бапст жасаған. Алтыннан жасалған бұйым 92 бриллиантпен, соның ішінде XIV Людовиктің камзолынан алынған екі «Мазарини» бриллианттарымен әшекейленген.[4]
Екі ұзын салпыншағы бар бантик түріндегі брошь 2438 бриллиантпен және 196 раушан қырлы таспен безендірілген. 1864 жыл шамасында брошь зергері Франсуа Крамер 1855 жылы жасаған белбеуден қайта өңделген. 4000-нан астам бриллиантпен әшекейленген бұл белбеуді императрица 1855 жылғы 25 тамызда Версаль сарайында британдық патшайым Викторияның сапарына арналған қабылдауда, кейін 1856 жылы ұлының шомылдыру рәсімінде таққан.[5]
Табиғи түсті Шри-Ланка сапфирларымен әшекейленген сапфирлі парюраны XIX ғасырдың алғашқы ширегінде (1801–1835) белгісіз шебер жасаған деп есептеледі. Ол императрица Жозефинаның қызы, Голландия патшайымы Гортензия де Богарне үшін дайындалған болуы мүмкін. Кейін парюра патшайым Мария Амалияға, содан соң Орлеандық Изабеллаға өткен. Диадема 24 сапфирмен (10 ұсақ және 14 ірі) және 1083 бриллиантпен безендірілген.[6]
Алқа әртүрлі көлемдегі сегіз сапфир мен 631 бриллианттан тұрады.[7]
Бір дөңгелек және бір алмұрт пішінді екі сапфир және 59 бриллианттан тұрады.[8]
I Наполеонның тапсырысы бойынша зергер Франсуа-Рено Нито (1779–1853) жасаған изумрудты парюра диадема, алқа, сырға және шаш тарағынан тұрады. Император бұл парюраны өзінің қалыңдығы Аустриялық Мария-Луизаға 1810 жылғы наурызда, үйлену қарсаңында сыйға тартқан. Басқа әшекейлерден айырмашылығы, бұл парюра императрицаның жеке меншігі болған. Алқа 32 изумрудтан (оның ішінде 10 алмұрт пішінді) және 1138 бриллианттан (874 бриллиант қырлы және 264 раушан қырлы) тұрады. Орталық 13,75 карат салмақты сегіз қырлы сопақ изумруд.[9]
Алты изумрудтан, оның екеуі алмұрт пішінді (45,20 карат), және 108 бриллианттан тұрады.[10]
Дереккөздер
- ↑ a b c Angelique Chrisafis. Priceless jewellery stolen from Louvre in raid by ‘experienced’ thieves // The Guardian, Sun 19 Oct 2025
- ↑ « Des bijoux d’une valeur inestimable » : le musée du Louvre cambriolé, des joyaux de la Couronne de France dérobés // Paris Match, 19/10/2025
- ↑ Diadème de l'Impératrice Eugénie // Collections de Louvre
- ↑ Broche dite broche reliquaire // Collections de Louvre
- ↑ Grand noeud de corsage de l'impératrice Eugénie // Collections de Louvre
- ↑ Diadème de la parure de la reine Marie-Amélie et de la Reine Hortense // Collections de Louvre
- ↑ Collier de la parure de saphirs de la reine Marie-Amélie et de la Reine Hortense // Collections de Louvre
- ↑ Boucle d'oreille, d'une paire (avec OA 11033) de la parure de la reine Marie-Amélie et de la Reine Hortense // Collections de Louvre
- ↑ Collier en émeraudes de la parure de Marie-Louise // Collections de Louvre
- ↑ Paire de boucles d'oreilles en émeraudes de la parure de Marie-Louise // Collections de Louvre