Магниттік механикалық құбылыстар

Магниттік механикалық құбылыстар

Магниттік механикалық құбылыстар, гиромагниттік құбылыстар — магнетизмді тасымалдаушы микробөлшектердің магнит және механикалық моменттерінің өзара байланысына негізделген құбылыстар жиыны. Қозғалыс мөлшерінің моменті бар кез келген микробөлшектің (электрон, протон, нейтрон, атом ядросы, атом) белгілі бір магниттік моменті де болады. Сондықтан микробөлшектер жүйесінің (физикалық денелер, үлгілер) қозғалыс мөлшерінің моменті артса, денеде (үлгіде) қосымша магнит момент пайда болады; керісінше, магниттелу кезінде дене қосымша механикалық моментке ие болады. Магниттік механикалық құбылыстар атомның магнит моментінің оның толық механикалық моментіне қатынасын (гиромагниттік немесе магниттік механикалық қатынас) анықтауға және әр түрлі заттардағы магнетизмді тасымалдаушылардың табиғаты туралы қорытынды жасауға мүмкіндік береді. Магнетизм құбылысын зерттеуге арналған жаңа әдістердің, әсіресе, резонанстық әдістің жасалуына байланысты Магниттік механикалық құбылыстардың ғылыми-зерттеулер жұмыстарындағы рөлі төмендеді.

Дереккөздер

• Қазақ энциклопедиясы