Маймақтық

Маймақтық

Маймақтық — адам табанында болатын кемістік. Маймақтық кезінде аяқ башайлары тілерсек буынынан ішке қарай иіліп, өкше қисаяды. Адам мұндайда табанның сырт жағына сүйеніп жүреді. Маймақтықтың іштен туа біткен және жүре пайда болған түрлері кездеседі. Туа біткен Маймақтық қаңқа сүйек ауруларынан (минералдық зат алмасудың бұзылуы), тұқым қуалаушылық және ата-анасының әр түрлі жұқпалы ауруларға (мерез, соз) ұшырауынан болады. Табанның бұлшық еті, тарамысы, сүйегі өзгереді. Әдетте Маймақтық нәресте туылғаннан-ақ белгілі болады, өздігінен түзелмейді, керісінше ұлғая береді. Маймақтықтың ауыр түрінде адамның дене салмағы табанның сыртқы қырына түсіп, оның терісі қалыңдап қатайып, мүйізгек қабат пайда болады. Мұндай өзгерген табанды қалпына келтіру өте қиын. Туа біткен Маймақтықты нәресте туған кезден бастап емдейді. Алдымен тәулігіне 6 — 7 рет емдік гимнастика, 10 — 12 күннен кейін табан әбден қалпына келгенше гипспен таңады. Арнайы ортопед. аяқ киім кигізіледі. Бұл емдеу нәтиже бермеген жағдайда, 2,5 — 3 жасында аяққа операция жасап, 6 ай гипспен таңады. Жүре пайда болған Маймақтық, көбіне жүйке жүйелерінің жұқпалы аурулардың (сүйек туберкулезі, сүйектің іріңді қабынуы, т.б.), тілерсек буынның зақымдануы, кейбір ісік аурулары салдарынан болады. Маймақтықтың бұл түрінде алдымен оған себеп болған ауруды емдейді. Тілерсек жарақатынан болған Маймақтық хирургиялық операция арқылы түзетіледі. Сонымен қатар, ортопедиология аяқ киім, емдік гимнастика қолданылады.

Дереккөздер

• Қазақ энциклопедиясы