Мансұр Сағатов

Мансұр Сағатов
Қонаев үй-музейі қабырғасындағы Сағатов ескерткіш тақтасы, Алматы
Негізгі ақпарат
Туған күні	2 қаңтар 1939 (1939-01-02)
Туған жері	Ұзынкөл, Жәнібек ауданы, Батыс Қазақстан облысы, Қазақ КСР, КСРО
Қайтыс болған күні	29 тамыз 2002 (2002-08-29) (63 жас)
Қайтыс болған жері	Алматы, Қазақстан
Мемлекет	КСРО  Қазақстан
Мамандықтары	композитор педагог
Аспаптары	флейта
Марапаттары

Мансұр Сағатов (2 қаңтар 1939 жыл, Ұзынкөл, Жәнібек ауданы, Батыс Қазақстан облысы – 29 тамыз 2002 жыл, Алматы) — кеңестік және қазақстандық сазгер, Қазақстанның еңбек сіңірген өнер қайраткері (1983), Қазақстанның халық әртісі (1990).

Өмірбаяны

Сағатов К.Байсейітова атындағы республикалық музыка мектебінің флейта класында оқыған.

1963 жылы ол Құрманғазы атындағы Алматы мемлекеттік консерваториясын (профессор В.В. Великановтың композиция класы бойынша) бітірген.

1963–1974 жылдары Сағатов Қазақ радиосы музыкалық редакциясының редакторы, бас редакторы, директоры қызметтерін атқарды.

1974–1986 жылдары ол Қазақстан Мәдениет министрлігі жанындағы репертуарлық-редакциялық бөлімнің музыка жөніндегі аға редакторы болды.

1974 жылдан ол Құрманғазы атындағы Алматы консерваториясында педагогтік қызметті қатар атқарды (1984 жылдан доцент).

Шығармашылығы

Сағатовтың шығармашылық жолы студенттік кезден басталады. Сол жылдары ол шекті аспаптар квартеті үшін сюита; виолончель мен фортепианоға арналған экспромт; қазақтың халық әні «Ләйлімнің» негізінде вариациялар жазды. Алғашқы үш бөлімді симфониялық шығармасымен дипломдық жұмысын қорғаған (кейін бұл шығармаға Қазақстан Ленин комсомолы сыйлығы берілген, 1967).

Скрипка мен оркестрге арналған концерті (1967), симфониялық оркестрге арналған «Мерекелік увертюрасы» (1972), «Мерген» симфониялық күйі (1976), «Мемориал» атты симфониялық сюитасы (1979), «Диалогтар» поэмасы, «Ақын толғауы», (1972, Ж.Жабаев өлеңіне жазылған), «Мерекелік кантата» (1980), «Достық елі» кантаталары (1982, өлеңдері Қ.Мырзалиевтікі) «Әлия» атты екі актілі балеті (1978, либреттосы Ж.Байдаралиндікі), т.б. көркемдік деңгейі жоғары шығармалар жазды.

Cағатовтың «Туған ел», «Алматым менің», «Бақыт құсы», «Той кеші», «Мені ізде», «Кел биле», «Кешегі арман — он жеті» сияқты көптеген әндері мен романстары халық арасына кең тарап, жұртшылықтың көңілінен шыққан туындылар.