Марат Балғожаұлы Кенжеғозин
Марат Балғожаұлы Кенжеғозин ( 30 мамыр 1939 — 24 маусым 2006 ) - қазақ ғалым-экономист, экономика ғылымдарының докторы, профессор, Еуразия Халықаралық экономикалық академиясының және Халықаралық ақпараттандыру академиясының академигі.
Өмірбаяны
[өңдеу | қайнарын өңдеу]1939 жылы 30 мамырда Солтүстік Қазақстан облысы Жамбыл ауданы Благовещенка ауылында Балғожа мен Жәмилә Кенжеғозиндер отбасында дүниеге келген.
Білімі
[өңдеу | қайнарын өңдеу]1947-1957 жылдары Солтүстік Қазақстан облысы Жамбыл ауданының Благовещенк орта мектебінде оқып, алтын медальмен бітірді.
1957-1962 жылдары Плеханов атындағы Мәскеу халық шаруашылығы институтын үздік бітіріп, экономист біліктілігін алды.
1962-1965 жылдары Плеханов атындағы Мәскеу халық шаруашылығы институтының экономикалық кибернетика кафедрасының аспирантурасында оқыды.
1967 жылы 19 қаңтарда Плеханов атындағы Мәскеу халық шаруашылығы институтында «Ауыл шаруашылығы өндірісін орналастыруды оңтайландырудың экономикалық-математикалық мәселелері (Солтүстік Қазақстан материалдары негізінде)» тақырыбындағы экономика ғылымдарының кандидаты дәрежесін алу үшін диссертациясы қорғады.
1970 жылы КСРО Жоғары аттестациялық комиссиясы оған «Экономикалық зерттеулердегі математикалық әдістер» мамандығы бойынша аға ғылыми қызметкер академиялық атағын береді.
1982 жылы РСФСР-дің Нечернозем аймағының Ленинград экономика және ауылшаруашылығы өндірісін ұйымдастыру ғылыми-зерттеу институтында «Ауыл шаруашылығы өндірісін дамыту мен орналастырудың кешенді негіздемесінің жүйесі (құрылыс және пайдалану әдістемесі)» тақырыбында «Халық шаруашылығы мен оның салаларын экономикалық зерттеулерде, жоспарлауда және басқаруда математикалық әдістер және компьютерлік технологияларды қолдану» мамандығы бойынша экономика ғылымдарының докторы дәрежесін алу үшін диссертациясын қорғайды.
1989 жылы КСРО халыққа білім беру жөніндегі мемлекеттік комитеті "Экономикалық басқару механизмі"кафедрасы профессор ғылыми атағын берді.
1998 жылы Еуразия Халықаралық экономикалық академиясының толық мүшесі (академигі) болып сайланды.
2000 жылы Халықаралық ақпараттандыру академиясының толық мүшесі (академик) болып сайланды
Жұмыс тәжірибесі
[өңдеу | қайнарын өңдеу]1957-1962 жылдары-Еңбек Қызыл Ту Орденді Г.В. Плеханов атындағы Мәскеу халық шаруашылығы институтының студенті.
1962-1965 жылдары - Еңбек Қызыл Ту Орденді Г.В. Плеханов атындағы Мәскеу халық шаруашылығы институтының аспиранты.
1965-1968 жылдары - Қазақ КСР Мемлекеттік жоспарлау комитеті жанындағы Ғылыми-зерттеу экономикалық институтының аға инженер-экономисті, аға ғылыми қызметкерінің міндетін атқарушы.
1968-1979 жылдары - Қазақ ауыл шаруашылығы экономикасы және ұйымдастыру ғылыми-зерттеу институтының экономикалық кибернетика кафедрасының меңгерушісі.
1979-1985 жылдары - КСРО Орталық статистика басқармасының Бухгалтерлік есеп және есептеу жұмыстарын механикаландыру жөніндегі Бүкілодақтық мемлекеттік жобалау-технологиялық институтының Қазақ филиалының директоры.
1985-1988 жылдары - Агроөнеркәсіп кешенін басқарудың республикалық жоғары мектебінің оқу ісі жөніндегі проректоры.
1988-1994 жылдары - Агроөнеркәсіптік кешенді басқарудың республикалық жоғары мектебінің ректоры.