Мария Андреевна Бульина

Мария Андреевна Бульина (1 қараша 1916 жылы, Пенза облысы, Голицыно ауданы, Скачки селосында туған – 1 қаңтар 1997 жылы, Алматы қаласында қайтыс болған) – медицина ғылымының докторы (1962 жылы), профессор (1964 жылы). Қазақ КСР-інің еңбек сіңірген дәрігері (1967 жылы).

Биографиясы

Алматы мемлекеттік медицина институтын (1939 жылы, қазіргі Қазақ ұлттық медицина университеті) бітірген. 1939–42 жылдары Қостанай облысы, Орджоникидзе ауданы, Денисовка кентінде дәрігерлік телім меңгерушісі, 1942–45 жылдары II-дүниежүзілік соғысқа қатысқан. 1946–60 жылдары Қазақ мемлекеттік медицина институтында ординатор, ассистент, доцент, кафедра меңгерушісі, 1960 жылы Ақтөбе мемлекеттік медицина институтында акушерлік-гинекологиялық кафедрасын ұйымдастырушы, 1967–69 жылдары осы институтта факультет деканы, оқу ісі жөніндегі проректоры, 1972 жылы штаттан тыс проректоры, 1983–85 жылдары профессор-кеңесші қызметтерін атқарды. Бульинаның докторы диссертация босануы қиын әйелдерді емдеу әдісі тақырыбына арналған. Қызыл Жұлдыз, «Құрмет Белгісі» ордендерімен, медальдармен марапатталған.