Масат ата жерасты мешіті

Масат ата қорымы. Муфлон мүсіні түріндегі қошқартастар. XVI–XVIII ғасырлар.

Масат Ата жер асты мешіті – Республикалық маңызы бар тарих және мәдениет ескерткіштерінің мемлекеттік тізіміне енген діни сәулет өнері ескерткіші.

Орналасқан жері

Маңғыстау ауданы Үштаған ауылынан оңтүстік-шығысқа қарай 40 км жерде орналасқан.

Қорым сипаты

Масат ата қорымы. Кесене қабырғаларына салынған граффити.

Зерттеулер нәтижесінде қорымынан 526 бірлік ескерткіштер есепке алынған.
Ескерткіштер шамамен 14 – 18 ғасырлар аралығын қамтиды. Бұлар негізінен: ортағасырлық түрікмен дәуіріне жататын қойтастар, тас қоршаулар, тас белгілер.
Қорымның солтүстік-шығыс жағында 18-19 ғасырларды қамтитын қазақтардың ескерткіштері сақталған. Мұнда қойтастардың алуан түрлері көптеп кездеседі.
Қорымның оңтүстік-батыс жағындағы жартасты жерден ойып жасалған жер асты мешіті орналасқан. Мешіттің ішкі аумағы төрт қанат киіз үйдей, төбесінде шаңырақ тәрізді ойығы бар. Оңтүстік жағындағы есік қапталынан михраб, қабырғаларынан сөрелер қашалған, кіреберістегі шағын дәлізі Меккеге қарай бағытталған. Төбесіндегі тесік аузы таспен биіктетілген. Мешіттің батыс жағында 3 м-дей қазылған жер орны бар; осыған байланысты бұл құрылыстың екінші бөлігі деген болжам жасауға болады. Мешіт алдындағы тақта тас үстінен суағарлар қашалып, оның тоғысқан тұсынан құдық қазылған.
Жер асты мешіті мен қорым 1982 жылы республикалық дәрежеде мемлекеттік қорғауға алынған.