Медициналық ғылыми қоғамдар

Медициналық ғылыми қоғамдар (ассоциациялар, қауымдастықтар, тағыда басқа) — медициналық ғылымның және тәжірибелік денсаулық сақтау мамандарының кешенді мәселелерді шұғыл шешу және ғылыми жетістіктерді тәжірибеге ендіру үшін құрылатын қоғамдық бірлестіктері. Медициналық ғылыми қоғамдар медициналық мамандықтарға сәйкес құралады, ал оған мүше болу — әркімнің өз еркі. Медициналық ғылыми қоғамдардың атқаратын қызметі алуан түрлі. Олар денсаулық сақтау ісін басқаруға қатысады және саяси, әлеуметтік-мәдени мәселелерді шешуге, қоғам мүшелерінің құқықтары мен мүддесін қорғауға, еңбек жағдайын және денсаулықты, тұрмысты жақсартуға мүмкіндік туғызуға ат салысады. Медициналық ғылыми қоғамдарды құру салалық ішкі қорларды жұмысқа жұмылдыру, ұйымдастырушылық жолдарын айқындауға бағытталған. Медициналық ғылыми қоғамдардың маңызы, әсіресе, медицина білімнің саласын жақсартуға, дәрігерлерді дайындау мен білімін жетілдіруде байқалады. Мемлекеттік тұрғыдағы маңызды шешімдерді қабылдауда мұндай бірлестіктер ұсыныстары есепке алынады. Олар медицина саласында республикалқы және халықаралық көлемде съезд шақыру, ғылыми конференция, кеңес-симпозиумдар өткізу жұмысына араласып, халық арасында медициналық білімді насихаттайды, шет ел ғалымдарымен әріптестік байланыс орнатады.