Мейіз Қарашақызы Ибалиева

Мейіз Қарашақызы Ибалиева (4.1900, Бөкей ордасы ауданында Орда ауылында туған - 1988, сонда) - ісмер, қолөнер шебері. Ауылдағы Жәңгір мектебінде оқыған(1908-12). Жас кезінде қыз-келіншектер күресіне қатысып,«түйе палуан» да атанған. 1943 жылы Сталинград түбіндегі Дубовка госпиталында жатқан ері Өтемісті жаяу (500 шақ.) арқалап, ауылға алып келген. 1930-35 жылы «сауатсыздықты жою»(ликбез) науқаны кезінде ауыл мектебінде сабақ берген. Соғыс жылдары қыз-келіншектерден майданға қолғап, шұлық тоқуды ұйымдастырған. «Танковая колонна» ісіне қаржы жинап, мал тапсырған. Қазақ, орыс ақындарының өлеңдерін жатқа білген ол жазушылар Ә.Сәрсенбаевқа, Б. Аманшинге - көптеген деректер берген (мыс., Махамбет өмірі туралы). Ұлы Отан соғысынан кейін мектепте тәрбиеші болып, қабілетті жас қыздарды жинап, алаша тоқу, киіз басу, сырмақ тігуді үйреткен, дайындаған текеметі Будапешт музейіне алынған (1983), тоқыған терме алашалары сақталған.